الأسد في توم وجيري.. حكايته إيه؟

إن شركة إنتاج أفلام أمريكية تختار الشعار ليها يكون أسد دي حاجة مختلفة عن المعتاد طبعًا، فاكرين الأسد اللي كنا بنشوفه بيزأر ويخضنا في بداية الأفلام الأجنبية زمان.

وعشان هى حاجة مش معتادة، قررنا إننا في الموضوع ده نحكيلكوا قصة شعار الأسد لشركة إنتاج الأفلام الأمريكية «مترو جولدن ماير» (MGM).

نبذة عن الشركة

هى شركة إنتاج وتوزيع أفلام أجنبية عالمية أسسها رجل الأعمال ماركوس لوي وهى من الشركات اللي أنتجت مجموعة كبيرة من أشهر كلاسيكيات السينما العالمية زي سلسلة أفلام جيمس بوند، وساحر أوز، وكمان أنتجت كارتون توم وجيري الشهير.

https://www.youtube.com/watch?v=tvexT_nar-k

واسم الشركة جه من دمج 3 إستوديوهات سينمائية في شركة واحدة وهما Metro Pictures Corporation وGoldwyn Picture Corporationو Louis Burt Mayer وبقت Metro Gloldwyn Mayer وإختصارها MGM.

نيجي بقى لقصة الأسد

فكرة شعار الأسد جات من إن واحد إسمه هاورد ديتز كان شغال في أستوديو تصوير واستوحى فكرة الأسد من فريق كان اسمه «الأسود» في الجامعة بتاعته وقرر إنه يصمم لوجو «الأسد» لشركة إسمها Metro pictures ولما إندمجت الشركة ديه مع شركة Goldwyn Picture Corporation ومع Louis Burt Mayer احتفظوا بنفس اللوجو وبقى الأسد شعار MGM.

والأسد ده إسمه «ليو» اللي كنا متعودين إننا نشوفه بيزأر في الأفلام، بس مكنش ده الأسد الوحيد اللي بيستخدموه كانوا بيستخدموا سبع أسود مختلفة بس كلهم ظهروا للعلن بإسم «ليو» كعلامة تجارية خاصة بالشركة.

ترتيب ظهور الأسود

الأسد الأول اسمه «سلاتس» وكان بيظهر بدون زئير في بداية الأفلام الصامتة لشركة MGM من سنة 1924 لي 1928.

https://www.youtube.com/watch?v=uioSEbYsqGc

والأسد التاني اسمه «جاكي» وكان أول ظهور لأسد بيزأر بشكل خفيف في الشعار وده كان مرتبط ببداية الأفلام المتكلمة لشركة MGM اللي إبتدت مع فيلم White Shadows on the South Seas واللي أخد أوسكار أحسن تصوير سينمائي سنة 1929.

https://www.youtube.com/watch?v=6pIfgwAlv0c

وأسد شركة MGM كان محل إعجاب لنجوم كتيرة وكانوا متشوقين على الرغم من خوفهم إنهم يتصوروا معاه.

النجمة جريتا جربو مع جاكي الأسد

أما الأسد التالت «تيلي» والرابع «كافي» فالشركة إستخدمتهم كتجربة في بداية الأفلام الملونة من سنة 1932 لي 1935 بس شافت إنهم مش هيكونوا مناسبين كشعار في أفلامهم الملونة. https://www.youtube.com/watch?v=XRYzIfUbOYY

أما الأسد الخامس فكان إسمه «تانر» وهو من أشهر الأسود اللي اتكلمنا عنها فوق لأن الأفلام اللي كان هو في بدايتها كانت تعتبر أفلام العصر الذهبي في هوليوود من سنة 1934 لي 1956.

https://www.youtube.com/watch?v=NECDz2m4ETg

والأسد السادس كان إسمه جورج وإستخدمته الشركة سنة 1956.

https://www.youtube.com/watch?v=Lev1m48vEio

وفي سنة 1957 استقرت الشركة على الأسد السابع «ليو» اللي بيعتبر رمز عظيم لشركة MGM.

https://www.youtube.com/watch?v=CV6GAoQCeKE

واستعانت الشركة مخصوص بالمنتج والمخرج ألفريد هيشتكوك عشان يخرج ليهم مقدمة أفلامهم اللي بطلها الأسد «ليو» ويقول تعليماته ليه :)