ماري عادل تكتب: احبطني شكرا
«مابقتش تفرق سينا من سونيا»، «تتحرق فوفا أكتر ماهى محروقة»، و«مفيش فايدة مفيش فايدة».. كلها إفيهات لطيفه بنسمعها في الأفلام وبنقولها لبعض بنضحك بيها وننبسط، بس الإفيه بيبقي حقيقي واحنا بنقوله، زى بالضبط احساس بنضحك من كتر همنا.
فيما يبدو علينا إن احنا بقينا عبارة عن «كتل من الطاقه السلبية المتحركة على أرجل».. كل واحد فينا بقي مصدر احباط للتاني يزهقه ويقرفه أكتر ماهو اصلا قرفان. ناقص نعمل حفلة احباط جماعي ونعيط فيها كلنا.
اللى بيبقى عنده حلم وبيحكي عليه، هوعارف إنه حلم بعيد وممكن يكون مستحيل كمان، أو اللى نفسه يشتغل شغلانة حلوة، أو اللى نفسه يلاقي شريك حياته.. الشخص ده بيحب يفضفض معانا اكمننا مريحين يعنى وكده، نقوم إيه بقي يا سيدي نكبسه ونقوله «كلها طموحات وأماني»، «أنت بتحلم أحلام يقظه»، و«تسافر إيه ولا تشتغل إيه ده احنا في أيام سودا».
أو مثلاً واحد بيتخرج فمستني الأحلام الوردية، فاحنا نمصمص شفايفنا ونقول ياعيني ده مايعرفش اللى فيها، ده هيخرج يتصدم بالواقع الآليم لدرجة إنه يفكر في الانتحار، يا هيشتغل شغلانة غير مجاله ويتمرمط، يا هيهج من البلد بالهجرة الغير شرعية .
يمكن كل ده حقيقي.. يمكن الواقع يقتل ويوجع، بس ليه نصدم الناس ونفضل نديهم طاقه سلبية، ماحنا ممكن نمصها ونديلهم بدل منها الايجابية.
نشجعهم.. نتفائل معاهم.. ونطمنهم ! نقول يارب.. حتى لو كل المؤشرات محبطة، فاحنا ممكن نحاول نصدق غير كده، لو عالجنا نفسنا بالإيحاء.. آه بالإيحاء.. سمعاك يللى هناك وأنت بتقول «ماهو هنعيش في عالم وهمى كده»، بس ردي «على الأقل مش هنفضل شايلين الهم ولا هنفضل نكره العيشه واللى عايشنها».
في عالمنا الوهمي هنخلق واقع جديد بطاقة إيجابية، ننبسط نتفائل نفرح على إيه هو مش عارفين الحقيقه، بس اهو حاجة تخلينا عايش ومتعايش .
كونك تحبط غيرك دي مش شطارة حضرتك.. هتقولي مانا بقوله الحقيقة، صح بس بتحبطه، بمعنى بتخليه مايفكرش حتى يمشى خطوة واحدة في طريق المليون ميل في حلمه! طب أنت فشلت عايز تشوف الكل فاشلين ليه؟
لما تحس انك عندك طاقه سلبية وإنها هتعدي اللى حواليك، حاول تعمل حاجه بتحبها، حاجه مؤمن بيها وبيقولولك إنك شاطر فيها موهبه يعنى، وأنت واثق إن دى أكتر حاجه بتحبها.. ساعتها هتتحول طاقتك السلبية لـ ايجابية، وهتعدي بيها الناس وهتكون عدوى مفيدة.
قول يارب عشان الى أنت فيه يمر، ربنا حتى لو دخلنا في تجارب أو اختبارات بتكون بسماح منه، متحبطش أنت نفسك وتقول لا خلاص مش هعمل اللي عليا وبتاع ! لا اعمل اللي عليك وسيب الباقي عليه، ربنا موجود وافتكر إن كل الخير ليك أنت، ومسير اللي أنت فيه ينتهى.
روح مكان تنبسط فيه مع ناس حلوة وطلع كل السلبي اللى جواك، روح للبحر شوفه ، حسه، شم يوده ... «الله»، شامين ريحته حلوة ازاى وبتغير مودنا، اسمع موسيقى روحها حلوة تضبط مودك تعملك دماغ.
الأكل ثم الأكل ثم الأكل... كُلْ حاجه حلوة تظبط بيها لسانك واشبع منها لأن الأكل بيظبط طاقتك جداً.
الضحك يا جماعة من أكتر الاسباب اللى هتخلى حياتك حلوة، هيطول عمرك ويخلى اللى قدامك يحب يبصلك. اضحكوا من قلبكم كتير ومتوقفوش ضحك على الفاضى والمليان ! الضحك من غير سبب مش قلة ادب ده بالعكس ده منتهى الادب والروح الحلوة .
دور على ناس طاقتها ايجابية تشحن منهم شوية، عشانك وعشان تدي غيرك، وابعد عن مصاصين الطاقه والمحبطين .
ملناش إلا بعض احنا اللى بايدينا نحبط بعض، واحنا اللى بايدينا نشفى ونعالج بعض، احنا اللى هنخلق جو ومود يخلونا عايشين، يخلوا طاقتنا ايجابية عندنا استعداد نحب ونشتغل ونعيش وناكل ونسافر، عندنا استعداد نعدي غيرنا وننشر الروح الحلوة .
بعد ده كله هتقولولى أمل إيه الى نخليه عندنا.. أمل ماتت محروقة، عامةً السعادة والأمل والتفاؤل، ماهم إلا قرار شخصي.
اقرأ أيضا ⇐ ماري عادل تكتب: سوق تعبير
