الطفل الوسطاني.. متفاوض وعنيد وأب عادل
الطفل المتوسط هو طفل كان مدلل في فترة ما في حياته لأنه كان الطفل الأصغر، لكن لما بيجي طفل تالت جديد، فجأة كل الاهتمام والدلع بيتوجه للطفل الجديد وأهله بيطلبو منه أنه يتنازل عشان أخوه الصغير.
كاترين شومان – مدونة ومؤلفة كتاب «سر الطفل المتوسط»- بتجاوب في الكتاب دا على أسئلة حول التركيبة النفسية للطفل المتوسط وصفاته ومميزاته وسلبياته.
أستاذة العلوم الأجتماعية والأسرية في بوسطن ليني جريفن بتقدم في مقالها على موقع Psychologytoday ملخص سريع عن مضمون الكتاب.
صفات إيجابية
الطفل المتوسط بيتفرض عليه وضع يخليه ينمي مهارات معينة عشان يستخدمها في التعامل مع أهله وأخواته الأكبر والأصغر منه، ومن المهارات دي :
- التفاوض
الطفل المتوسط متعود أنه مش دايما الي عاوزه هو الي هيحصل، دا بيخليه ينمي مهارات التفاوض والنقاش من وهو صغير زي الرئيس الراحل أنور السادات، ومايكل جيرستنر-المدير التنفيذي لشركة نابيسكو- ويتعود أنه يتنازل في أوقات كتير عن حاجات علشان يكسب حاجات تانية.
- الرغبة في التغيير
زي تشارلز داروين، ووليام ديل – مؤسس شركات ديل- الطفل المتوسط بيحب يتعرف على الأفكار الجديدة ووجهات النظر المختلفة وكمان عنده المبادرة لإحداث تغيير في المحيط اللي حواليه.
ليني جريفن بتقول: «إحدى الدراسات أثبتت أن 85% من الأطفال المتوسطين عندهم الرغبة في التجربة والتغيير والتعرف على أفكار جديدة، مقارنة بـ 50% من الأطفال الكبار».
- تحقيق العدالة
الطفل المتوسط قد يشعر بالظلم في طفولته في أحيان كتير، خاصة أن أهله في مرحلة ما بيطلبوا منه يتحمل مسئولية الأخ الأصغر وهو قد يكون غير مؤهل لدا، ودا بيخليه يحس أن الحياة غير عادلة، وأن مكانته كطفل مدلل كانت من حقه واتاخدت منه.
عشان كدا الطفل المتوسط بيكبر نفسه يحقق العدالة ويوقف الظلم، زي نيلسون مانديلا وسوزان أنتوني (مناضلة أمريكية مهتمة بحقوق المرأة).
صفات سلبية
- العند
الطفل المتوسط ممكن يكون عنيد أحيانًا، لان الأهل مش بيستجيبوا لطلباته بسهولة على عكس الطفل الأصغر أو الأكبر، ودا بينمي فيه صفة العند والإصرار أو التعنت، ودي البعض قد يراها ميزة أو عيب. لكن الأكيد أن لها جانب سيء كبير خاصة لو كان عنيد لمجرد العند.
- الإحساس بالاضطهاد
نتيجة أنه عدى بمواقف كتير فيها ظلم من وهو صغير، دا أحيانًا بينعكس على أنه يحس دايمًا بالاضطهاد أو بأنه بيتم التمييز ضده زي ما كان بيحصل وهو طفل صغير.
كاترين شومان وثقت إحدى الدراسات في كتابها واللي نتيجتها كانت أن الأطفال المتوسطين لما بيكبروا وبيقى عندهم أطفال، بيتيحوا حرية أكبر لأطفالهم وبيحاولوا يحققوا درجة من العدالة بينهم، مقارنة بالأطفال الأكبر اللي بيبقوا أباء محافظين وصارمين مع أبناءهم.
وختمت «ليني» مقالها بنصائح للمتوسطين في حياتهم بشكل عام :
- مقدار الاهتمام الأسري الموجه ليك، مش هيحدد أنت مين أو هتعيش حياتك إزاي.
- العند تصرف طفولي، وممكن يخسرك حاجات كتير في حياتك.
- أنت بطبعك بتحب الوسط في كل حاجة، لكن مفيش مانع من تجربة بعض المخاطر المحسوبة.
اخترنا لك
