7 أخطاء لا تبدأ بها يومك في العمل

الدقائق الأولى في اليوم بتأثر بشكل كبير على مستوى إنتاجيتك في الـ 7 أو 8 ساعات شغل طول اليوم.

فلو جيت الشغل متأخر، أو قعدت ترد على كل الرسايل اللي عندك أول ما وصلت الشغل هتضيع وقت كتير جدًا كنت محتاجه عشان تنجز اللي وراك، وهتشتت نفسك ومش هتقدر تركز طول اليوم.

الكاتبة والمدونة ودكتورة علم النفس بجامعة «برانديز» Brandies في الولايات المتحدة شانا ليوبويتز بتقول في مقالها المنشور بمجلة Business insider إن في 10 أخطاء هي الأسوأ على الإطلاق في بداية اليوم، و«شبابيك» هيعرفكو أبرز الأخطاء دي عشان متقعوش فيها.

الوصول للشغل متأخرا

 

دا ممكن يدمر يوم الشغل كله قبل ما يبدأ أصلًا. دراسة جديدة نشرت في Huffington Post بتقول إن المدراء بيدوا تقييم للموظفين اللي بيوصلوا متأخر أقل من تقييم الموظفين الي بيوصلوا بدري، حتى لو دا مش مؤثر أوي على الإنتاجية أو هيمشوا متأخر اليوم دا.

ممكن دا يكون تصرف غير عادل من المديرين، بس دا الحقيقة والواقع عشان كدا حاول تيجي الشغل بدري قدر الإمكان.

إنك متصبحش على زمايلك

من أبسط القواعد الأخلاقية أنك تحيي زمايلك الصبح أو تسلم عليهم. خبيرة إدارة المنظمات الأمريكية لينن تايلور بتقول إن: «لو أنت مدير أو قائد المجموعة في الشغل، يبقى من البديهيات أنك الصبح تسلم عليهم، لأن دي أبسط قواعد التواصل الاجتماعي والعلاقات، وحتى لو أنت مش القائد أو المدير كونك تيجي الصبح وتلاقي زملاءك قاعدين ومتسلمش عليهم دا خطأ كبير قد يقلل من مهنيتك قدامهم».

شرب القهوة

إحدى الدراسات الحديثة بتقول إن أفضل وقت لشرب القهوة هو ما بعد الساعة 10، ودا لأن هرمون الكورتيزول (المسؤول عن التحكم في الضغط العصبي وتنظيم العمليات الحيوية في الجسم) غالبًا بيتم إفرازه في توقيت 8 أو 9 الصبح، ولما تشرب قهوة في الوقت دا جسمك هيعتمد على الكافيين ومش هيفرز الكمية الكافية من الكورتيزول.

وبمجرد ما الكورتيزول يقل من جسمك بعد الساعة 9:30 أو 10، ممكن ساعتها تشرب كوباية قهوة.

الرد على كل الرسائل قبل البدء في العمل

المؤلف والمحاضر العالمي في نظم العمل ماكيل كير يقول إن «الـ10 دقايق الأولى في يوم العمل، ممكن تستغلها في أنك تلقي نظرة سريعة على الرسايل والإيميلات وترتبها حسب الأولوية للرد لكن متردش عليهم كلهم في وقتها».

بدء العمل بدون خطة واضحة

تنصح خبيرة إدارة المنظمات الأمريكية لينن تايلور بأنك لازم تحط خطة لوقتك في العمل، لأنك لو محطيتش خطة، خطط كتير هتتفرض عليك ومش هتقدر تنظم وقتك، عشان كدا مهم تحط خطة محددة ليومك في العمل وتحط في الاعتبار الوقت الي هتستغرقه كل مهمة.

الاجتماع مع الموظفين

الاجتماعات الصباحية تعتبر إهدار للطاقة، دا لأن طاقة الفرد الصبح بتكون في أعلى مستوى ليها، وبتقل لحد ما توصل لبعد الضهر.

عشان كدا الوقت الصبح مش لازم يضيع في الاجتماعات، وإنما الاجتماعات الأفضل انها تتعمل في وقت الضهر أو بعد الضهر، إلا لو كانت محتاجة مجهود ذهني كبير في التفكير.

البدء بالمهام البسيطة

الأبحاث بتقول إن طاقة أي إنسان بتقل مع الوقت على مدار اليوم، عشان كدا مهم أنك تستغل طاقتك الصبح في إنك تعمل الحاجات الكبيرة المطلوبة منك واللي بتحتاج تركيز.

بعض الناس بتسمي الأسلوب دا «تناول الضفدع» Eating the frog، والضفدع هنا مقصود بيه المهمة المعقدة أو الصعبة.