ابسطي صاحبتك المكتئبة بـ8 حاجات
أوقات كتير بتلاقي صحبتك داخله في حالة اكتئاب مش عارفة تخرج منها، واللي بيزيد المشكلة إحساسك بالعجز ناحيتها، لا أنتي عارفة تقربي بسبب صعوبة الظروف، ولا أنتي عارفة لما تقربي المفروض تعملي إيه؟
في البداية قبل ما نقولك مجموعة أفكار هتفيدك في إسعاد صديقتك المكتئبة، لازم تعرفي إن الوقت ده مش وقت تبعدي فيه عنها، لازم تقربي بأي وسيلة حتى لو تليفون، ولو الظروف كانت كويسة شوفي الأفكار دي هتفيدك.
- اسمعيها كويس
البنت لما بتدخل في حالة اكتئاب بيبقى نفسها تروح لأقرب الناس ليها علشان يسمعهوا، صحيح إن مش الكل كده وأحيانًا في مكتئبين بيفضلوا السكوت بس الحالة دي لحد متى؟
مهما الوقت طال هي هتبقى عاوزه حد يسمعها، وأكيد الحد ده هيكون أنتي بصفتك صاحبتها اللي المفروض إنك تعرفيها أكتر من أي حد، علشان كده اوعي تسبيها الفترة دي واسمعيها كويس.
- الحضن مهم
في الفترة دي هي هتكون محتاجة منك الطبطبة عليها، بس مش بالكلام وبس لازم تعرفي إنها محتاجاكي تحضنيها علشان تعرف تحس بأمان جواكي.
انفوجراف| تخلص من الاكتئاب بفسحة وأكلة ولون
ده غير إن الحضن ليه فوائد علمية خاصة بإفراز هرمون الأوكسيتوسين المعروف باسم هرمون السعادة، ده غير كده إنه بيخفف الألم وبيقلل من الشعور بالإجهاد.
- اعملي اللي بيفرحها
مهم جدًا إنك تدوري على اللي بيسعدها وتعلميه علشان تحس إنها مش لوحدها؟ أو إن زعلها حاجة بتزعلك أنتي كمان.
اعرفي إزاي تحسسيها إن فرحتها أهم شيء عندك، ولو بتحب أكلة معينة اعزميها عليها، لو في أخبار هتفرحها قوليلها، لو الخروج هو اللي هيغير مودها متتأخريش بس المهم إنك تكوني معاها دايمًا في حزنها قبل فرحها.
- ابعتيلها مسدجات تقويها
لو ظروفك متسمحش إنك تكوني جنبها في أصعب لحظات حياتها، ابعتيلها مسدجات قوليلها فيها إنك جنبها وإن أي إنسان مهما مر بأوقات صعبة هيجي عليه وقت يحس إنه أفضل.
خليها تصحى الصبح وتلاقي منك مسدج وتنام بالليل بردوا على مسدج تانية، الشعور ده لوحدة هيخفف عنها حزنها حتى لو إنتي بعيدة.
- اعزميها على سينما
قبل ما تقرري هتخرجيها فين لازم تعرفي الأول هي بتحب إيه، يعني لو مثلًا بتحب السينما اعزميها على نوعية فيلم هي بتحبه، أو مسرح، أوبرا.. إلخ، المهم إنه يكون مكان هي بتحبه.
الخروجة دي اللي إنتي حاسه إنها مش هتفرق معاها كتير، هتخليها تنسى حزنها شوية وتركز في العالم اللي حواليها.
- قوليلها إنك بتحبيها
كلمة بحبك حتى لو منكِ إنتي كفيلة بإنها تغير مودها كتير، مش لازم تكون من الحبيب المهم إنها تحسها منك بالتصرفات والكلام كمان.
متنسيش كمان إن في وقت الاكتئاب هي ممكن تحس إنها مش مرغوبة من ناس حواليها وبالتالي كلامك هيقويها وهيرجعلها ثقتها في نفسها.
إزاي تقتل الاكتئاب بورقة وقلم؟
- فاجئيها بهدية نفسها فيها
لو في حاجة نفسها تجيبها بقالها فترة بس الظروف مسمحتش، فكري تجيبهالها أنتي وفي الوقت ده فرحتها بالهدية هتنسيها شوية الحزن وخصوصصا لو الحاجة دي كان نفسها جدًا إنها تجيبها.
لو مفيش هدية معنية، فكري في أي حاجة تانية إنتي عارفة إنها هتسعدها بردوا، مش مهم هي إيه بس الضروري إنك تحاولي.
- ضحكيها
معروف إن الضحك ليه دور مهم في تحسين الحالة النفسية للأشخاص وزيادة شعورهم بالسعادة، بالإضافة لدوره المهم في تقليل الإحساس بالتوتر والألم.
علشان كده متنسيش الخطوة دي واوعي تحسي إن أهميتها قليلة؛ لإن في الحقيقة الضحك ده هينسيها همومها.
