في ذكرى ميلاد نعيمة عاكف.. حكايات من حياة «لهاليبو»
النهاردة 7-10 عيد ميلاد نعيمة عاكف اللي بمجرد ما كانت بتطل علينا من الشاشة كانت بتسيب بهجة جوانا، وده لأن وشها كان بشوش مبتسم دايمًا للحياة، فلما بترقص إيقاع رقصها بيرّقص قلوب، ولما بتمثل تمثيلها بيأثر في النفوس، ولما بتغني غناها زي صوت الكروان في الليل الحزين، فكانت تستحق لقب الفنانة الشاملة لأنها كانت طاقة تمثيلية بتشع إبداع.
وعشان كده احتفال "شبابيك" بيها النهاردة هيكون بأننا نحكي لكوا حكايات من حياتها، بس قبل ما أحكي يلا نتطفي شمع ميلادها.
الحيلة لما كان عندها حوالي 4 سنين، حب والدها أنه يعلمها مبادئ فن السيرك، بس هي مكنتش مدية اهتمام للموضوع، فعمل والدها حيلة تخلي عندها استعداد للتعليم وهو أنه علم وشجع أختها ومداش اهتمام ليها، وده خلاها تغير من أختها ويظهر جواها دافع التعلم، وفعلًا اتعلمت الأكروبات في أيام قليلة جدًا وبقت نجمة الفرقة الأولى.
أول مرتب نعيمة نجحت في وقت قصير أن يبقى ليها جمهور كبير بيجي مخصوص عشان يشوفها، وده شجعها أنها تطلب من والدها مرتب مخصوص، وكان عندها وقتها 6 سنين، فخصص ليها والدها مرتب قرشين لو كان السيرك شغال وقرش واحد في حالة البطالة والأجازات الطويلة.
العروسة شيكابوم نعيمة كانت بتحب العرايس جدًا لدرجة أنه لما كان بيبقى معاها فلوس كانت بتجيب بيها عروسة، وفي يوم سمعت أن أحسن راقصة في مصر كلها كانت "سنية شيكابوم" فسمت عروستها "شيكابوم" وكانت بتقف قدامها ترقص زي ما بترقص، وبكده اتعلمت "نعيمة" الرقص. بديعة مصابني "بديعة" اتشدت لرقص "نعيمة" وأخواتها في فرقة "على الكسار"، وعشان كدة طلبت أن يشتغلوا عندها في الفرقة مقابل أجر 15 جنيه، وكان في الفرقة بنت اسمها "تيشي" كانت بتقول مونولوجات على حركات رقص الكلاكيت، وكانت "بديعة" بتحب رقصها جدًا، وده خلى "نعيمة" تغير منها، وقررت أنها تتعلم. راحت لمدرب يعلمها بس كان هياخد فلوس كتيرة وهي مكنش معاها فلوس كافية فقررت تعلم نفسها، خدت في مرة الجزمة بتاعة "تيشي" من وراها، وحاولت ترقص بيها، وفعلًا بعد ساعتين من الرقص اتعلمت رقص الكلاكيت وراحت لحد عشان يعملها جزمة شبه الجزمة دي وعملها، وقعدت تتدرب بيها أسبوع في المسرح، وبعدين راحت قالت لـ"بديعة" إنها حابة ترقص كلاكيت، "بديعة" كانت مترددة في الأول بس بعد كده وافقت واندهشت بجمال رقصها. أعمالها الجميلة أول فيلم ليها كان "لهاليبو"، وبعد كده قدمت أعمال كتيرة زي: ظابط وأربع بنات، وتمر حنة، ومدرسة البنات، وأمير الدهاء، وغيرها من الأعمال اللي هنفضل دايمًا فاكرينها وعمرنا ما ننساها. كل سنة وأنتي دايمًا ركن أساسي من أركان زمن الفن الجميل.
