10 مشاهد لن تنساها من دراما رمضان 2016 (فيديو)

رمضان السنة دي كان مليان مسلسلات زي عادته :D. لكن فيه بعض المشاهد من الأعمال اللي اتعرضت علّمت مع الناس وتداولها الشباب على مواقع السوشيال ميديا لاعجابهم بالآداء التمثيلي فيها. 

ونوس

 وسوسة ونوس لغريب 

المشهد ده قدر فيه ونوس يوسوس لغريب إنه ينتحر بمكر ودهاء كبير منه ولما غريب إنتحر ضحك ونوس وقاله جملته الشهيرة في المسلسل «في حد يسمع كلام ونوس يا غبي» والمشهد ده قدر يجسد أية من أيات القرأن الكريم في سورة الحشر بتقول «كمثل الشيطان إذ قال للإنسان اكفر فلما كفر قال إني بريء منك إني أخاف اللّه رب العالمين».

 ياقوت وونوس 

فيه مشاهد كتير جمعت بين ياقوت وونوس كانوا فيها في حالة صراع تمثيلي متميز ويمكن المشهد ده من المشاهد اللي قدروا هما الإتنين يجسدوا فيها حالة وسوسة الشيطان لبني آدم في كل خطوة بيخطيها. وفي كل خطوة آدم بيقرب لربنا فيها الشيطان بيحاول يبعده عنه.

المسلسلات نسخة من أفلام زمان.. هل ده فقر في الكتابة؟

جراند أوتيل  حب علي لنازلي 

المشهد ده من المشاهد الرقيقة اللي جمعت ما بين علي ونازلي واللي بيعترف فيها بإعجابه بنازلي وبيقولها «أنا يمكن ماكونش الشاطر حسن بس انتي اكيد ست الحسن و الجمال».

 أنوشكا

 أنوشكا في مونولوج ليها من جراند أوتيل جمعت مابين صلابة المرأة من برا وإنكسارها من جوا من خلال أداء تمثيلي متمكن وتعبيرات وش كل جزء فيها بيعبر عن إحساس جواها  وأكتر جملة علمت مع الناس هى جملة «وجع، وجع ايه أنا مش موجوعة، أنا ست من إزاز مبحسش».

سقوط حر

علاقة الأم ببنتها ومدى الأذى النفسي اللي بتسببوا بعض الأمهات لولادها تحت إطار إنهم خايفين عليهم لكن دايمًا كتر الكبت بيولد الإنفجار. وده اللي حصل في المشهد اللي جمع ما بين صفاء الطوخي ونيللي كريم اللي فيه انفجرت نيللي كريم في وش مامتها لما قالت ليها إنها هتتجوز وطلعت كل اللي في قلبها من أذى نفسي سببته مامتها ليها.

أفراح القبة درية وتحية

مباراة تمثيلية شوفناها ما بين صبا مبارك ومنى زكي في المشهد ده اللي قد إيه كان بيعبر عن حالة الصراع اللي هنشوفها ما بينهم طوال المسلسل وزي ما تكون درية كانت بتحسد تحية على كل حاجة حلوة بتعيشها ودايمًا واقفة ضد حياتها.

الهاشا باشا تاكا 

طارق أول لما عرف إن تحية بتحب شكوكو غنى ليها  أغنيته وقالها الهاشا باشا تاكا والهاشا باشا تك وراحت تحية ردت عليه وكملت تحية الأغنية وقالتله يعني وبعدين معاكا ياساقيني المر سك. :D .والمشهد ده كان من أكتر المشاهد الجميلة اللي أحيت روح مونولوجات شكوكو :)

نيللي وشيريهان

القبض على إيمي

المسلسل ده مليان مشاهد كوميدية ويمكن من أكتر المشاهد اللي بتهلك من الضحك :D مشهد لما قبضوا على إيمي سمير غانم ومفروض دنيا كانت السبب في القبض عليها قام شيكو دخل إيمي السجن بدل دنيا :D

فوق مستوى الشبهات

مشهد قتل يسرا لشيرين رضا مشهد كان غاية في الجبروت والتميز في الأداء التمثيلي واللي فيه كانت بكل هدوء بتتكلم عن الأصحاب إن فيه منهم بيعاملونا حلو قوي لكن من جواهم بيلعنوا وجودنا  وإن قد إيه الزمن بقى وحش.

وإكتشفت شيرين رضا إن يسرا من الأصحاب دول بعد لما اعترفت ليها إنها قتلت الدكتور وإن السم اللي في القهوة هى اللي حاطته بإيديها ليها.

الأسطورة

مشهد موت رفاعي أثار سخرية البعض على مواقع التواصل الإجتماعي لأنهم إعتبروا فتحة الرصاصة بتاعته أكبر فتحة رصاص في تاريخ الدراما المصرية لأن كان شكلها الكبير غير منطقي والبعض التاني أثار موته حزنهم وضيقتهم.