متقولهاش بحبك.. الحاجات دي هتدوبها أكتر

كتب- أميرة خالد:

البنت كائن بيحب الاهتمام بطبعه، وبتحب تسمع كلام  يطمنها ويحسسها بأنوثتها طول الوقت لأنها مهما كانت قوية فهي أجمل ما فيها ضعفها.

وعشان كده كلمة بحبك هي من أكتر الكلمات اللي الشباب بيفتكر أنها هي بس اللي بتسحر قلب البنت وبتفرحها، بس فيه كلمات تانية تأثيرها ساحر على البنت وبيخليها برضه مبسوطة.

إذا كنت بتحبها حاول تقولها الكلام ده عشان بيفرق معاها بس أهم شيء يكون عن صدق يعني أنت بتقول الكلام ده فعلا عشان أنت حاسه مش مجرد مراضيه.

• وحشتيني

من أكتر الكلمات اللي ممكن تسعد البنت احساسها أنها حد مهم في حياتك بمجرد غيابها عنك لفترة بتحسها أنك مفتقد جزء مهم منك وبتبقي طايرة ساعتها من الفرحة.

• عاوز أسمع صوتك

الكلمة دي من الكلمات السحرية اللي بتحبها أي بنت لأنها تنم عن الاهتمام، وفكرة إن فارق معاك أنك تسمع صوتها وإن صوتها مصدر سعادة بالنسبالك بيحسسها بالفرحة وبيملى حياتها طاقة.

• شكلك حلو النهارده

الكلمة بتفرق مع البنت لأنك بتحسسها أنك مركز معاها وأنك شايفها أحلي بنت في الدنيا ده بيزيد من ثقتها بنفسها وبيخليها مبسوطة.

• أنتي خسيتي

البنت دايما بتحب تظهر بشكل مميز وبتحب تحس أنها حلوة فكلمة خسيتي هتزود الثقة في نفسها وهتحس بالانجاز والاعتزاز بنفسها

• عايز أخد رأيك في حاجة

الكلمة دي بتخليها تحس أنها مهمة بالنسبالك لدرجة أنك مش عاوز تاخد قرار من غير متاخد رأيها بالذات إذا كان قرار يخص حياتك الشخصية، فهتحس ساعتها بفرحة كبيرة.

• حلمت بيكي

أنك تحلم بحد معناه أنك بتفكر فيه لدرجة كبيرة أو طول الوقت على بالك فانت لما بتحلم بيها وتيجي تقلها ده بيسعد قلبها بدرجة كبيرة وعشان تعرف تحلم بيها فكر فيها كتير وأنت لو حبيبتها بصدق هتلاقي ده بيحصل لوحده.

• أنا جنبك

البنت بيجي عليها أوقات بتحس فيها أنها ضعيفة أنها محتاجة سند جنبها يحسسها أنها هتبقي كويسة وهتعدي من اللي هي فيه ده، والكلمة دي بتخلي البنت تطمن، وخصوصا لو كنت صادق البنت بتبقي حاسة بكل حرف في الكلمة.

• احكيلي عملتي إيه النهارده

أنك تسأل عن تفاصيل يومها مش من باب الفضول أو الشك لكن من باب أنك عاوز تطمن عليها وتبقى حابب أنك تعرف يومها حصل في أيه، وأيه حصل ضايقها إلخ.

• بغير عليكي

مش مقصود بالكلمة فكرة السيطرة والتحكم الزايد بس هي بتحب تسمعها لأن البنات بتحب تحس أنك غيران عليها من أي حد بس مش الغيرة القاتلة، لكن الغيرة اللي تزود الحب.