حماتك سر سعادتك.. إزاي تكسبي قلبها من بدري
لو لسه بتقولي يا هادي في علاقتك مع حماتك ومش عارفة إزاي تكسبي قلبها وتخليها تحبك، هتلاقي في الموضوع ده نصايح عن طريقة التعامل معاها من طقطق لسلامو عليكوا.
النصايح دي بيقدمهالك مدرس الطب النفسي بكلية الطب بجامعة أسيوط وزميل الجمعية المصرية والأوروبية والعالمية للطب النفسي دكتور محمد فوزي عبد العال.
حماتك سبب طلاقك
في البداية دكتور «عبد العال» بيقول إن الموضوع ده مهم تناوله في الوقت الحالي وده لأن الجهاز المركزي للتعبئة العامة والإحصاء بيقول إن معدل الطلاق في مصر عالي جدًا وأن أسباب الطلاق راجعة لعدم اتفاق البنت مع حماتها.
وطبعًا الطلاق بالنسبة للزوجة بيسبب ليها أثر نفسي سيء بيترتب عليه إنها تدخل في حالة إكتئاب من 3 إلى 5 سنين والإكتئاب ده سببه إحساسها إن دي خلاص النهاية وكمان سببه النظرات اللي بتطاردها سواء نظرة المجتمع ليها إنها مطلقة أونظرة بيت أهلها ليها إنها حمل وعبء عليهم لو مكنش ليها دخلها الخاص. via GIPHY
أما الزوج فالأثار النفسية المترتبة على الطلاق عليه لاتتعدي الـ6 شهور والدليل إنه بيفكر إنه يتجوز مرة تانية. وعشان كده لازم من البداية نقول لأي بنت إزاي تكسب قلب حماتها لأنها هتعيش معاها أكتر ما عاشت في بيت والدها ووالدتها.
قد يهمك: كيف تتجنبي المشاكل مع «سلفتك»؟
دليلك لكسب قلبها
متخليش عندك روح المنافسة معاها في حب ابنها وتعملي كل الطرق اللي تخليه يحبك أكتر ما بيحبها لأنك في الأخر هتخسريه وهتخسريها فحبيه براحتك وسيبيها برضه تحبه براحتها متقوميش بدور المسيطر عليه.
عدم تبديل الأدوار via GIPHY
إنك تقومي بدور الأم في محاولة للسيطرة منك عليه وإنك تخليه ميحتجش ليها لأن أنتي قايمة بدورها وده طبعًا غلط جدًا لأن أمه موجودة ودايمًا هيكون محتاج ليها ولحنانها فمارسي دورك كزوجة وسيبيها تمارس دورها كأم ومتفكريش أبدًا إنك تلغي دورها ده.
التواضع والحب
خليكي متواضعة مع حماتك متتكبريش عليها ولا تعامليها بتناكة ولا تتكلمي معاها بطريقة ناشفة خالية من العاطفة واعتبريها زي مامتك ولو حبة تقولي ليها يا ماما قوليلها لكن لو مش حبة تقولي كلمة ماما ليها يبقى حسيسيها دايمًا إنك بتحبيها بكلامك اللطيف معاها.
وخليكي حاطة في دماغك إن في تغيير نفسي حصل ليها بسبب إن ابنها اللي كان ونس ليها في حياتها بعد عن حضنها واتجوز، صحيح هي كانت بتتمنى اليوم ده بس برضه بعده عنها أثر عليها تأثير سلبي وعشان كده محتاجة منك إنك تطمنيها دايمًا وتحسيسيها إنك بتحبيها مش كارهها ومستحوذة على ابنها ومخلياه ميزورهاش غير كل فين وفين.
ولو خطيبك قالك إنك هتعيشي معاهم في بيت العيلةن في الحالة دي بقى هتعملي الآتي مع حماتك اللي تضاف للحاجات اللي اتكلمنا عنها فوق لأن وجودك في بيت العيلة معاها هيختلف طبعًا عن وجودك في بيت بعيد عنها.
قد يعجبك أيضا: 4 أسباب تؤدي لفتور الحياة بين الزوجين
طقوس بيت حماتك
هتسألي خطيبك عن نظام البيت بتاعهم وإيه الحاجات اللي بضايق حماتك وإيه الحاجات اللي بتحبها واللي بتتضايق منه ابعدي عن إنك تعمليه عشان لو عملتيه هتحس إنك بتستفزيها.
بلاش رد فعل عنيف via GIPHY
لو حصل مشكلة بينك وبينها متعمليش رد عنيف وسريع بإنك تقولي هسيب البيت وأمشي واهدي وجيبي جوزك واحكيله عشان الوضع يهدى بينك وبينها.
الصراحة والمصداقية
ولازم وإنتي بتحكي اللي حصل تكوني صريحة وصادقة متتبليش عليها بكلام على إعتبار إنك واثقة إن جوزك هيكذب مامته ويصدقك إنتي وده عمره ما هيحصل. فمتخسريش مصداقية حماتك وجوزك.
ولو افترضنا إن حماتك هي اللي قالت عليكي حاجة محصلتش متكدبهاش وخليكي كويسة وصريحة وصادقة زي ما قولنا في كل اللي حصل.
قد يهمك أيضا: يعني إيه استشاري العلاقات الأسرية؟ وهيعملك إيه؟
ثقافة الاعتذار
لازم يكون عندك ثقافة الإعتذار لو عملتي غلط اعتذري مش عيب على فكرة وحافظي على اللي بينك وبين جوزك. وفي النهاية متبقيش كويسة مع حماتك في فترة الخطوبة ولما تتجوزي تقلبي عليها، لأ خلي علاقتك معاها جميلة سواء في الخطوبة أو الجواز.
علاقتك معاها وتأثيرها على الزوج
وطبعًا علاقتك بينك وبين حماتك بيكون ليها تأثير كبير على جوزك سواء بالسلب أو الايجاب والتأثير ده بينعكس على نفسه وعلى تعامله معاكي.
لو علاقتك سلبية بيها
ده هيأثر على جوزك بالسلب وهيدخل في حالة إكتئاب وإحباط وتوتر وقلق و ألم جسماني زي الصداع وألم المعدة وسبب الألم ده هو تفكيره في علاقتك المتوترة بأمه وهيبقى في أي لحظة مستني أي حد فيكوا يتكلم ويقوله إلحق تعالى شوف اللي بيحصل.
وده هيخليه يحس إنه في ترس مامته من ناحية ومراته من الناحية التانية وهو في النص بيضغط عليه من الناحيتين وده هيخليه يندم إنه إختارك ويقول ياريتني ما اخترتها وياريتني كنت سمعت كلام أمي واتجوزت البنت اللي كانت عايزاني أتجوزها مش البنت اللي اختارها قلبي واللي ياريته ما إختارها والندم هيبقى أولى العلامات المبكرة في إنه يفكر يطلقك.
لو علاقتك إيجابية بيها
ده هيخليه يشتغل كويس ومزاجه يبقى عال العال ونفسيًا مبسوط من جواه وهيبقى عنده ثقافة الرضا إنه راضي عن إختياره ليكي وإن ربنا كرمه بيكي والرضا ده هيبان في تصرفاته الجميلة تجاهك.
