يا للصاعقة «I know him».. (مقال)
مقال بقلم: رغدة جلال الدين
«فضيحة بجلاجل» دي الجملة اللي نقدر نوصف بيها اللي حاصل على موقع فيسبوك بقالو يومين ولحد دلوقتي على جروبات «I know him» للبنات و«I know her» للشباب. بس قبل ما أدخل في تفاصيله حبة أتكلم في البداية عن مفهوم الجروب اللي واضح إن فيه ناس نسيت هو معمول ليه أصلًا.
الجروب أو «المجموعة» بتضم مجموعة من الأصدقاء أو موظفين في شركة، أو ناس متعرفش بعض في الأساس، ولكن عايزة تستمتع وتستفيد من الهدف، أو الغرض، أو الخدمة اللي بيقدمها الجروب، زي جروب «حد يعرف» الشهير على الـ«فيس بوك» اللي معمول منه واحد للولاد و واحد للبنات.
يعني الجروب عامة بيكون هدفه خدمي بيساعد الناس لكن كونه يتحول لمكان لفضح الناس، فهنا لازم نقف شوية ونحلل اللي بيحصل ده.. يعني ايه يتعمل جروب «I know him» البنات تتأكد فيه إذا كان الشخص اللي متقدملها أو تعرفه أو اللي سابها! فتحط صورته وتقول للناس حد يعرفوا يا جماعة ولا لا؟.. محدش فكر في إن ممكن يؤدي لخراب بيوت وجرائم قتل، وممكن يكون الشخص ده مظلوم أصلاً
حقيقي «يا للصاعقة».. والولاد طبعًا مسكتوش وعملوا جروب «I know her» كرد فعل للحفلة اللي اتعملت عليهم في جروبات البنات، وبقينا قصاد جروبات فريقين أي حد يقدر يدخل عليهم ويشوف قدسية العلاقة العاطفية اللي للأسف اتعرت في وسط ميدان عام وبقت مباحة إن أي حد يعلق عليها.
للبنات فقط.. هتوقعيه في حبك إزاي؟
مش بس كدة، ده فيه خطوبات اتفسخت وفيه ناس اطلقت وفيه سكرين شوت اتاخدت من جروب البنات واتحطت عند جروب الولاد والولاد علقت بأفظع الكلام ده غير الكوميكس اللي عملوها عليهم.
ومبقاش مستبعد إننا نصحى الصبح نلاقي جروب «قالت عليكي» يتحط فيه كل النم اللي اتقال على الناس ولا جروب «عايز عروسة بشروط» والولد فيه يتشرط عايز إيه في عروسة المستقبل والبنات تدخل تشوف إذا كانت مطابقة للشروط ولا لأ ماهى هيصة بقى.
وكله عايز يعمل أي جروب يتشهر بيه، ومش مهم ده على حساب إيه. حد هيقولي أهو ده اللي خدناه من السوشيال ميديا؟ هقوله الفكرة مش في السوشيال ميديا الفكرة في استخدامنا ليها، إحنا اللي بإيدينا نستخدهما في إننا نساعد الناس أو نفضح الناس.
للبنات.. تسريب من الشباب عما يلفت انتباههم في اللقاء الأول
ليه يا Her
وبما إن البداية كانت من عند «I know him»، فـ ليه يا Her تكملي العلاقة مع شخص وإنتي مش واثقة فيه وشاكة في كل لحظة إنه يعرف عليكي حد أو لو انتي أنهيتي العلاقة معاه ليه بتدوري وراه إذا كان يعرف حد ولا لأ هيفيدك بإيه إنك تعرفي ما إنتوا خلاص سبتوا بعض.
ازاي توصلي الموضوع بينكوا إنوا يبقى فضيحة لأن للأسف مفيش وصف تاني ليه مواجهتيش اللي مرتبطة بيه إذا كان يعرف حد ولا لأ ليه مسبتهوش فترة كنوع من الزعل عشان يحس بقيمتك لو إنتي حاسة إنو مخبي عليكي حاجة ليه فضلتي الطريق الأسهل إنك تدخلي على جروب وتنزلي صورتوا وتقولي يابنات حد يعرفوا ولو لقيتي حد يعرفوا هتسيبيه مش كدة.
طب افرضي بقى إن اللي بيقولك يعرفوا كان بيهزر معاكي بحكم إنه يضحك على رد فعلك استفدتي إنتي إيه بقى غير إن حياتك اتخربت بسبب كومنت. أو ولد يشاء القدر إنه يطلع صاحبه ويعملك سكرين شوت للبوست بتاعك لأنزي ماهو واضح الجروب فيه ولاد، ويروح بعتها ليه هتبقي استفدتي إيه برضه غير إنك بوظتي صورتوا قدام كل الناس وبوظتي صورتك إنتي كمان وكسرتي العلاقة اللي بينكوا ومسحتي كل اللحظات اللي جمعتكوا باستيكة.
للبنات.. جمل لو سمعتيها ماتصدقيهاش
ولا الكارثة كمان إن صورتك ممكن حد ينزلها على جروب «I know her» وساعتها الموقف هيبقى مش حلو خالص، خاصة إننا في مجتمع المواقف دي البنات بتحاسب فيها ع المشاريب أكتر من الولاد اللي أهاليهم ممكن يفرحوا بيهم عشان بيعرفوا بنات!، فكون صورتك بيتعلق عليها تعليقات من نوعية أنا أعرفها ديه كانت معايا في الجامعة واللي ممكن أي حد من قرايبك يشوفها أو اخواتك، ده هتكون نتايجه كارثية عليكي.
وساعتها هتبقي اتحطيتي في موقف مش لطيف خالص السبب فيه هو اندفاعك وشكك في الشخص اللي تعرفيه اللي عايزة أقولك بقى بما إن الموضوع وصل لحد جروب ونشر صور، سيبيه خالص لأن مش هينفع تكملي معاه وإنتي حاطة ليه سكينة ورا ضهرك سيبيه ولما تيجي تختاري احسني اختيار الشخص اللي يصونك وتكوني مالية عينه وإنت كمان اختار البنت اللي تصونك وتكون مالية عينك.
