لو لسة مخطوبين.. المكالمة بينكوا تبقى كده
عشان الخطوبة بينكوا تكمل على خير وتوصلوا مع بعض لعش الزوجية لازم تعرفوا تعملوا بينكوا حدود في المكالمة، و«شبابيك» هيساعدكم في الموضوع ده.
أجانب عن بعض
استشاري العلاقات الأسرية أسماء مراد بتقول إن العلاقة بينكوا في الشرع كأنكوا بالظبط أجانب عن بعض بمعنى إنكوا لازم تتعاملوا مع بعض زي الأغراب وتحطوا حدود ما بينكوا لأن وارد إن الموضوع ميكملش.
ولازم تعرفوا إن فيه عرف وتقاليد مجتمع بتحكم العلاقة بينكوا ومتقلدوش مجتمعات تانية أجنبية ملهاش دعوة بعرف مجتمعنا.
حدود المكالمة
«مراد» بتقول إن ممنوع الكلام بعد منتصف الليل، لأن ممكن كلامك الرومانسي يأثر عليه لأن الخضوع بالقول مؤثر جدًا في جذب الراجل وممكن يخليه يتجاوز في الكلام معاكي، وإنتي كمان غصبًا عنك هتلاقيكي بتتجاوزي وبتتكلمي كلام مش مسيطرة فيه على مشاعرك. وتوقعوا في المحظور انتوا الإتنين .
التجاوز
والتجاوز ده النقطة المهمة التانية اللي استشاري العلاقات الأسرية بتقولك خلي بالك منها قوي بمعنى إنكوا متعملوش حاجة خارجة إطارها مفروض يكون في العلاقة الزوجية بس وتبصوا على الموضوع إن إحنا مسيرنا هنتجوز يعني لأن ممكن زي ما وضحنا ممكن تسيبوا بعض.
وتضيف «مراد» إن حدودك في المكالمة هي اللي هتخليكي سواء انتي أو هو متوصلوش للنقطة دي لأن لو وصلتوا ليها هتبقوا برة إطار عرف المجتمع اللي بيحكم علاقتكوا ومش مستبعد إنكوا ممكن تفسخوا الخطوبة وساعتها هتبقي خسرتي كتير، وترجعي تقولي ياريتني عملت حدود ومكونتش هحس بالألم النفسي اللي حساه ده.
اعرفي إنك لازم تكوني ملتزمة في الخطوبة عشان حياتك تكون كويسة بعدين. وكمان لازم تحافظي على مخزونك العاطفي.
ومتستهلكيش مشاعرك في الخطوبة عشان لما تتجوزوا متلاقيش نفسك خلصتي كل المشاعر اللي عندك وبتتعاملي معاه معاملة جامدة خالية من المشاعر لأنك خلصتي كل اللي عندك.
المدة
بلاش تطولي مدة المكالمة ويفضل إنكوا تتقابلوا في أي مكان لأن التواصل من خلال الموبايل أو السوشيال ميديا بيقلل من الترابط الإجتماعي بين الناس وبيزود الفجوة. والمشاعر والكلام اللي فيه بتكون محتاجة تتقال وانتوا في وش بعض عشان تحسوها لأن المشاعر الإلكترونية بتكون جامدة غير محسوسة.
كمان «مراد» بتقول إن فيه زوجات ساعات بيتصدموا بالواقع بعد لما يتجوزوا إن مش ده الشخص اللي كان هاريني عواطف على السوشيال ميديا وبيحب فيها ليل نهار وبتكتشف إنها كانت راسمة خيال لشخص تعامله خدعها من ورا الشاشة الإلكترونية غير كلامه على أرض الواقع وده راجع لأنهم قضوا فترة خطوبتهم على الشاشة ومنزلوش يشوفوا بعض غير كل فين وفين.
