خريج زراعة مش جنايني ده برنس.. معلومات تهمك عن الكلية ومستقبلها
كلية الزراعة من الكليات اللي مهدور حقها جدًا في التنسيق، ولو جاتلك أوعى تبقي زعلان بالعكس لازم تبقي فخور بيها.
في التقرير ده «شبابيك» هيعرفك كل حاجة عن الكلية على هيئة سؤال وجواب، «من طقطق لسلامو عليكم».
كلية الزراعة من الكليات العلمية الموجود في جامعات كتير زي القاهرة، وعين شمس، والمنصورة، وأسيوط، وسوهاج.. الخ.
الدراسة فيها كام سنة؟
الدراسة فيها 4 سنين.
الدراسة فيها بلغة إيه؟
في قسمين لزراعة: في زراعة عربي وده بتدرس فيه كل حاجة باللغة العربية، وفي قسم خاصة لزراعة بتدرس فيه باللغة الإنجليزية وده بيبقي بمصروفات خاصة.
خلصت ثانوي ومحتار تدخل إيه؟.. 3 مواقع تساعدك
طب أدخلها من علمي ولا أدبي؟
بما أنها كلية علمية يبقي لازم تدخلها من علمي بس الكيلة متقسمة أقسام لشعبة العلمي علوم، ولشعبة الرياضيات والأقسام أحيانا بتختلف من جامعة للتانية.
طب إيه هي أقسام علمي رياضة؟
أقسام شعبة الرياضيات بتدرس فيه قسم الهندسة الزراعية، وبتتخرج منه مهندس زراعي وبتنقسم لأقسام داخلية زي:
هندسة الري والصرف الصحي
ودي هتتدرس فيها أعمال التصميم الزراعي، وتصميم الآليات والأجهزة الزراعية، وتطور الطرق لحفظ التربة والميه.. إلخ.
هل يمكن الالتحاق بكلية الصيدلة بعد كلية الزراعة؟
الميكنة الزراعية
ودي بتصنع فيها الآلات الزراعية اللي بتوفر الوقت والجهد المبذول في الزراعة، وبتساعد على زيادة مساحة الرقعة الزراعية لتلبية الاحتياجات البشرية.
تصميم الحدائق واللاندسكيب
ودي اللي هتتدرس فيه كل ما له علاقة بـ«هندسة الحدائق»
وفي أقسام تانية زي: علم البيئة- صناعات غذائية - تصنيع زراعي- علم المراعي والغابات، وهكذا.
وإيه هي أقسام علمي علوم؟
بص يا سيدي أقسام علمي علوم 6 أقسام، وهي:
تكنولجيا حيوية:
ودي اللي بتدرس فيه 3 حاجات: كيمياء وهتعرف فيها التفاعلات الكيمائية والمعدلات، وكمان بتتدرس ميكرو وده بقي هتدرس فيه الميكروبات والجراثيم وإزاي تتخلص منهم، وآخر حاجة هتدرسها هي الـ DNA. ولما تتخرج من القسم ده ممكن تشتغل في معامل تحاليل أو شركات أدوية
علوم وتكنولجيا الأغذية
بتدرس فيه صناعات الغذائية زي الألبان وتصنيعها وعمليات تعقيمها.. إلخ. والشغل في القسم ده بيبقي في مصانع أغذية وفنادق.
إنتاج نباتي
وده بقي بتدرس فيه كل ما له علاقة بالنبات من ناحية نباتات الزينة، والطبية اللي بتستخدم في صناعات الأدوية، وكمان زراعة الأنسجة يعني إزاي بنخلط نباتين في بعض وبيتقسم لأقسام داخلية زي بساتين، ومحاصيل. والشغل في القسم ده بيبقي في مزارع أو مشاتل أو صناعات الأدوية.
خلصت ثانوية عامة.. اسمع بقى نصيحة السابقين
إنتاج حيواني
وده الدراسة فيه بتنقسم فيه لحاجتين: الحيواني، وده بتدرس فيه كل حاجة تخص الحيوانات المزرعية من أكل، وشرب، وتكاثر. والشغل هنا بيبقي في مزارع البقر والأغنام. والتاني هو الداجني، وبتدرس فيه كل ما له علاقة بأنواع الدجاج، والبط، والأوز.. إلخ.
قسم الوقاية وأمراض النبات
وده بقي هتدرس فيه إزاي بتحافظ على النباتات من أي ظروف خارجية، أو من الحشرات الضارة، وبتدرس كمان في القسم ده الأمراض اللي بتيجي للنبات وإزاي تعالجهم.
اقتصاد زراعي ومجتمع ريفي
وده كله حسابات وقوانين بتتعلم فيه إزاي تزيد الدخل، وقروض المزارعين، وهكذا.
مستقبل خريج كلية الزراعة
يمكن لخريجي كلية الزراعة العمل في شركات المبيدات، مراكز البحوث الزراعية، الحجر الزراعي في المطارات والموانىء، يمكن توضيح مجالات العمل المتاحة لبعض الأقسام فيما يلي:
- التقنية الحيوية (بيوتكنولوجي): متاح لهم العمل في المجال الطبي أو مجال تصنيع الأدوية مثل استنبات للأنسجة أو تصنيع مضادات السرطان، العمل أيضَا في المجال الزراعي مثل مجال إنتاج النباتات المعدلة وراثيًا.
- الصناعات الغذائية: العمل في مصانع الأغذية (مثل مصانع المشروبات الغازية، رقائق البطاطس وما إلى ذلك) سواء كمهندس إنتاج أو مراقب جودة.
- الألبان: متاح له نفس فرص العمل المتاحة لخريجي الصناعات الغذائية تقريبًا، حيث يمكن لخريجيه العمل في مصانع الأغذية خاصة المعنية بمنتجات الألبان (الجبن، الزبادي، الآيس كريم،...) يحق لهم أيضًا التقديم في دبلومة التغذية والعمل كأخصائيين تغذية.
- الكيمياء الحيوية: العمل في شركات الأدوية وتصنيع المبيدات، مصانع الصابون والزيوت والمنظفات، مستحضرات التجميل، جميع المجالات الأخرى المتعلقة بالكيمياء.
- الإنتاج الحيواني، إنتاج الدواجن، إنتاج الأسماك: يمكن لخريجي هذه الأقسام العمل داخل معامل التفريخ أو مصانع الأعلاف أو مزارع الأسماك.
- البساتين: العمل في مزارع الإنتاج النباتي سواء للخضروات أو الفاكهة أو نباتات الزينة أو نباتات طبية وعطرية، كما يمكنهم العمل داخل المشاتل وشركات إنتاج البذور والتقاوي، أو داخل محطات فرز وتعبئة الفاكهة والخضروات المجففة والمجمدة والطازجة، علاوة على إمكانية العمل كمراقب جودة داخل مصانع تصنيع منتجات الفاكهة والخضراوات والعصائر.
- أمراض النبات: متاح لهم العمل داخل مزارع الفاكهة أو الخضراوات ومنتجات المحاصيل.
- قسم المحاصيل: العمل في مجال المحاصيل الحقلية (الأرز، الفول، العدس وما إلى ذلك) بالإضافة إلى إمكانية العمل داخل مراكز البحوث.
- البيئة والزراعة الحيوية: العمل في مجال تدوير المخلفات عمومًا والمخلفات الزراعية خاصة بالإضافة إلى امكانية العمل في المكافحة وإنتاج النباتات الطبيعية 100% (النباتات العضوية) علاوة على العمل في مجال معالجة المياه (إعادة استخدام مياه الصرف الزراعي في الري مرة أخرى)
- وقاية النبات: مهندس مكافحة في المزارع أو شركات المبيدات وتصنيع الأسمدة، أو مهندس في مناحل العسل أو إنتاج الحرير من دودة الحرير (دودة القز)
