هتشتغل دكتور ومهندس ومدرس.. جمد قلبك وادخل كلية علوم

كلية العلوم من الكليات المهمة في أي دولة بس مهدور حقها عندنا شويتين. الشخص اللي بيبقي داخلها غالبا بيكون ملحقش كليات القطاع الطبي، فالكلية بتكون البديل المتاح قدامه.

سواء دخلتها بمزاجك أو دخلتها غصب عنك في شوية حاجات لازم تعرفها عن الكلية، علشان تكمل فيها وتتميز ومتنصدمشي.

 أولا: هي كلية بتدرس فيها كل أنواع العلوم سواء الحية أو الغير حية الخاصة بالطبيعة وهكذا.. دراستها بتكون باللغة الإنجليزية.

ثانيا: كلية علوم مدة الدراسة فيها 4 سنين

بتاخد من كام؟

تنسيق سنة 2016 كان الحد الأدنى من علمي علوم 94.1 ومن رياضة 84.2%

ثالثا: ممكن تدخلها من شعبة علمي علوم أو علمي رياضة بس خلي بالك لكل شعبة في أقسام محددة.

أول لما تيجي تدخل سنة أولى هتختار شعبة من التلاتة دول:

1- مجموعة العلوم الطبيعية والرياضية: وده بقي لعلمي رياضة بس

2-مجموعة العلوم البيولوجية: القسم ده لطلاب علمي علوم بس

3-مجموعة العلوم الجيولوجية والجيوفيزياء: ينفع  للشعبتين سواء علوم أو رياضة

هتدرس إيه أول سنة؟

في بعض  الكليات في سنه أولى هتدرس 5 مواد أساسيه 3 منهم إجباري زي «رياضه – كيميا – فيزيا» واتنين إختياري بيأهلوك  للقسم اللي انت عاوز تتخص فيه بعد كدة في سنة  تانية.

المواد الاختياريه زي «جبر – إحصا – بيوفيزيا – حيوان – نبات – حشرات – جيولوجيا – جيوفيزيا – بيولوجي – فلك».

في مواد إختياري خاصه لعلمي رياضه بس زي «الجبر- الإحصاء»

مواد إختياريه خاصه لعلمي علوم بس«حيوان – نبات – حشرات –بيولوجي –بيوفيزيا».

مواد إختياريه مشتركه ينفع رياضه أو علوم يختاروها منها «جيولوجيا – جيوفيزيا – فلك».

إزاي تتخصص في القسم اللى أنت عايزه؟ 

1) جامعات زى القاهرة واسكندرية وغيرها بتتخصص من سنة تانية على أساس تقدير سنة  أولى.

2) جامعات زي عين شمس والسويس وغيرها بتتخصص من سنة أولى على أساس المجموع الاعتبارى وهو مجموعك في الثانوية العامة + مجموع مادة او مادتين من (فيزيا، كيمياء، رياضة، جيولوجيا).

إيه الأقسام اللي في الكلية؟

كلية العلوم من الكليات اللي فيها أقسام كتيرة جدا وكل جامعة فيها أقسام مختلفة عن التاني يعني مثلا أقسام كلية العلوم المفعلة بجامعة القاهرة 24 قسم منهم:

7 أقسام متاحة لطلبة علمي علوم فقط

8 أقسام متاحة لطلبة علمي رياضة فقط

9 أقسام مشتركة لطلبة علمى علوم وعلمى رياضة

أبرز الأقسام

1-قسم الكيمياء اللي بينقسم داخليا لعدة أقسام زي «كيميا حيوية-كيميا تحليلة-كميا عضوية-كميا صناعية».

2-قسم البيولوجي اللي بينقسم لـ 3 أقسام «قسم الحيوان-قسم النبات-قسم الحشرات».

3-قسم الحاسبات والرياضة اللي بتدرس فيه تقريبا كل فروع الرياضة اللي تتخيلها.

4-قسم الفلك والأرصاد الجوية  اللي بتدرس فيه كل ما له علاقة بالنجوم والكواكب.

5-قسم الجيلوجيا قسم هتدرس فيه كل ما له علاقة بسطح الأرض والمعادن.

6-قسم الفيزياء اللي بيختص بدراسة القوانين والعلاقات الرياضية المختلفة.

الأقسام الخاصة في الكلية

البرامج الخاصة في الكلية هما (2) « برنامج علوم البترول الجيولوجية -البيوتكنولوجي»، والتخصص فيهم بيكون من سنة أولى، والقسمين بدون شروط ومفتوح العدد لأي طالب يدفع 12 ألف جنيه في السنة + 10% زيادة كل سنة.

قسم علوم البترول الجيولوجية

القسم موجود فى كليات العلوم جامعات القاهرة وعين شمس والإسكندرية والمنيا والإسماعيلية وبورسعيد والمنوفية والمنصورة وأسيوط وغيرهم وفي بعض الجامعات القسم ببلاش زي السويس والزقازيق وبورسعيد والمنيا، وبتدرس في سنة أولى كيميا وفيزياء ورياضة وجيولوجيا وجيوفيزياء 1 & 2 وبتتخصص من سنة أولى فى القسم.

قسم بيوتكنولوجي

البرنامج موجود فى كليات علوم جامعة القاهرة واسكندرية وحلوان والمنصورة والزقازيق وبنها والسويس وغيرهم وفى كليات زراعة جامعات كتيره بردو وموجود فى زراعة القاهرة بمصاريف، وفى بعض الجامعات ببلاش سواء من زراعة أو علوم زى جامعة السويس والزقازيق، والبرنامج متاح لطلبة علمي علوم ورياضة، بتدرس العامل الوراثي في النبات والحيوان والإنسان وده مدخل لعلاج الأمراض، أما بالنسبة للنبات والحيوان فممكن تتدحل لزيادة الإنتاج، وبيدرس علم الاحماض النووية وتحاليله والمناعة وكيميات كتير زي الكيميا العضوية والغير عضوية والكيمياء الفيزيائية والتحليلية وغيرها.

مجالات العمل بعد التخرج

هي بتختلف شوية طبيعة وظيفتك من قسم للتاني بس في المجمل ممكن تشتغل «دكتور تحاليل-باحث-مندوب شركات أدوية-مهندس بترولي-التدريس في المدارس والجامعات».