ضي جمال تكتب: ميكسات الكشري بين "يععع" و"يامي"
أكلة شعبية كلنا بنعشقها؛ حبّنا فيها منعرفش سببه إيه يمكن عشان هيا أكلة لمة فيها من كل نوع حاجة "رز ،مكرونة ، شعرية، عدس، ولو حبيت حمص" بتفكرنا بلمة عيلتنا من كل عمر واحد" تيتة وجدو، بابا وماما، أخوكي الكبير وأختك الصغيرة" الكشري، عشق لا ينتهي أكلة الغلابة والناس الكلاس ..بس تروح فين من الإفتكاسات..عندك في المنيو كشري بـ" الكبدة، السجق،الفراخ،الشاورما،.." كتير كنت بخاف أكل كشري بحاجة عليه من الافتكاسات الجديدة ديه، أنا متعودة أكل الكشري بصلصته الحراقة والورد "البصل" الكتير و الدقة إللي مغرقاه؛ لكن المزاج بيحكم إنك تجرب حاجة جديدة. لمة كشري الساعة 9 بالليل محموعة بنات جعانة جدًا خلصت جامعتها وكورستها وطبعًا الكسل هيمنعهم من وقفة مطبخ بعد يوم هد وتعب؛ قدام جامعة القاهرة "سندوتشات صبري" أحسن واحد بيعمل مكسات في كل حاجة في الأكل. بنت منهم " أنا هطلب كشري بالكبدة" التانية إللي هيا أنا "يععع.. في حد بياكل كشري وعليه كبدة" البنت "ده حلو جداا ..جربيه، ولا أقولك دوقي كشري بشاورما الفراخ ..تحفة" أنا "إمممممم.. ممكن" إتنين كشري لو سمحت واحد بالكبدة والتاني شاورما فراخ المكس كشري بالشاورما، شكله فى البداية غريب هو نفس طبق الكشري العادي بس عليه شاورما فراخ متقطعة صغير ريحتها حاجة سوري فيها ثوم عالي جداا وصوص الشاورما مغرق الكشري حتي الخضروات إللي فيها من فلفل أخضر وطماطم وبصل كله موجود أخد نفس طعم الشاورما السوري بالصوص التومية بتاعهم. كشري بالكبدة، استفزني شكل الكشري بالكبدة لأنه كان ناشف مفهوش أي صوص للكبدة إللي عارفينها.. دوقت معلقة من صحبتى طبعًا بعد غلازة منها وهيا بتقولي "مش قلتي يععع عايزة تدوقي لية؟" وفي الآخر أخدت معلقة؛ طعمه مش وحش مقبول لعشاق الكبدة. عدت سنين، و حاولت أرجع ذكريات الكلية مرة تاني، وأنا قدام مطعم "جحا" إللي في أخر شارع فيصل قرب ميدان الرماية؛ فى المنيو كشري بـ شاورما الفراخ؛ إممم .. طيب لو سمحت واحد كشري بالشاورما. الصدمة الجوع فكرني علي طول بطعم الكشري إللي أكلته من كام سنة وطبعًا توقعت إنه هيكون بنفس حلاوة الطعم والدسامة بتاعت كشري"صبري" ..لكن للأسف مأخدتش بالي إن المطعمين مختلفين. طبق مش كبير كشري ناشف، عليه شوية شاورما صغيرين؛ عبارة عن قطع فراخ صغيرة جدا ممكن أقول كنت بصطادها، الطماطم ناشفة ومحروقة والفلفل عادب جداا.. من الآخر طعم الكشري كان في حاجات كتير غلط زي ما تقول إنه "بواقي الحلة" .. إفتكرت أيام الجامعة وقلت ياريتنى ما رجعتها، وفينك يا صبري تشوف أخرة كشري الشاورما.
