احترس.. عادات خاطئة يقع فيها من هم دون الـ18
بداية الشباب مرحلة عمرية بتظهر فيها روح المغامرة وحب التجريب، لكن هذه الرغبة المندفعة في الاستمتاع بكل ما هو جديد، بتوقع الشاب أو الفتاة في أخطاء يدفعون ثمنها طوال حياتهم.
في التقرير ده هنقدم ليك أبرز الأخطاء القاتلة، بناء على تجارب الشباب، وإزاي يمكن تتجنبها أو تتخلص منها بناء على آراء خبراء تربويين وأطباء نفسيين في حديثهم لـ«شبابيك».
التدخين مش بالبساطة دي
هتلاقي أسباب كتيرة تدفعك للتدخين.. الرغبة في الظهور بشكل شبابي أو «رِوش» أو الهروب من ضغوط الامتحانات. «الكبار» من عائلتك.
أو ممكن تشوف أن السجائر «شيء عادي» بيلجأ ليها جميع الأصدقاء أو الأقارب.. فليه متجربهاش زيهم ؟ أو تسأل نفسك: ليه المفروض مدختش وكل الناس بتدخن؟
يحكي حسام محمد 29 سنة لـ«شبابيك»: «بدأت تدخين من أيام الكلية، كنت حابب فكرة أني أشرب سجاير ومستمتع بيها لحد دلوقتي، ورغم أن أكتر من شخص في العائلة ماتوا بسبب السجائر.. لكن مقتنع أني هقدر أبطلها في الوقت المناسب».
ويعلق استشاري الطب النفسي والمخ والأعصاب، الدكتور إبراهم مجدي بأن «أضرار التدخين زي مشاكل الرئة والتنفس والسرطان وأمراض القلب، تظهر على المدى البعيد، ومع التقدم في السن فقط، لكن عند وصولك للمرحلة دي بتكون اتعودت على السجائر ولن تستطيع الامتناع عنها».
وبيضيف مجدي لـ«شبابيك»: «مشكلة جميع المدخنين اللي عايزين يبطلوا تدخين هي التعود، وعدم قدرتهم على التخلص منها حتى مع الشعور بأضرارها الصحية عليهم».
«فالامتناع عن التدخين أساسه الإرادة والقدرة على السيطرة على النفس. وأن يعرف المراهق أن التدخين هو البوابة الأولى للمخدرات».
المخدرات.. هتدمن من غير ما تحس
تبدأ الحكاية بسيجارة «محشية» يعزم عليك بيها أحد الأصدقاء. أو بقرص «ترامادول» في يوم مزحوم بضغوط الامتحانات عشان تقدر تركز أو تواصل المذاكرة. وممكن يكون بدافع المغامرة وحب التجريب وتجربة كل ما هو ممنوع. لكن الأمر يخرج عن السيطرة تماما.
يحكي محمد مجدي 26 سنة (اسم مستعار) لـ«شبابيك»: «في أيام الكلية ومع ضغط الامتحانات، اضطريت لبعض الأدوية الممنوعة، عشان بتساعدني على التركيز.. مقدرش أقول أني وصلت لمرحلة الإدمان، لكن برده مقدرش أتخلى عنها في أوقات الضغط العصبي».
ويقول استشاري الطب النفسي والمخ والاعصاب: «هينتقل الشاب من مرحلة حب التجريب للتعود اللي بيوصل للإدمان وعدم القدرة على التخلص من المخدرات دي».
وبينصح «لو كانت عندك الإدراة تبعد عن المخدرات قبل الوقوع في خطر الإدمان، فلازم تكون عندك الشجاعة لإخبار أهلك باللي وصلت ليه، عشان يساعدوك على التخلص من هذه العادة».
ويضيف الخبير التربوي واستشاري العلاقات الأسرية، الدكتور كامل ناصر، أن التخلص من المخدرات بيبدأ بالإرادة القوية في التغيير، والاستعانة بأحد المراكز المتخصصة في علاج الإدمان، إذا وصل الأمر لهذه المرحلة.
كل ثوم وزنجبيل.. 10 نصائح لو عايز تبطل «حشيش»
العادة السرية تدمر العلاقة الزوجية
لما بيدخل الشاب أو الفتاة في مرحلة المراهقة بيلاقي نفسه أمام رغبة جنسية شديدة الإلحاح، تدفعه لممارسة العادة السرية.
يقول مجدي: التأثير النفسي الكبير للعادة السرية هو أنها تمنع الشاب أو الفتاة من إقامة علاقة زوجية صحية، لأنه بيكون اعتاد على طريقة معينة للاستثارة الجنسية».
تحكي وفاء محمد 24 سنة (اسم مستعار) لـ«شبابيك»: «ممكن توصل ممارسة العادة السرية لثلاث مرات يوميا. وكنت شايفه أنها متنفس طبيعي، لحد ما ابتديت آخد بالي أنها فعلا بتأثر عن نظرتي للعلاقة الحميمة، وسبب في أني كنت بتردد في موضوع الزواج».
ويوضح استشاري العلاقات الأسرية لـ«شبابيك» بعض الخطوات التي تساعد على التخلص من العادة السرية وهي:
- الوازع الديني، فممارسة العادة السرية تعد من المحرمات
- الابتعاد عن الأصدقاء الذين يشجعوك على هذه الممارسة
- التوعية الذاتية ومواجهة النفس بالأضرار الصحية والنفسية التي تسببها العادة السرية
- الابتعاد عن المواد المحرضة سواء الأفلام الإباحية أو السوشيال ميديا
- ممارسة الرياضية لأنها تقتل النشاط الزائد في الجسم
- شغل وقت الفراغ بالاهتمامات المفيدة حتى لا تفكر في الخيالات الجنسية
تمارس العادة السرية؟.. إن أردت الإقلاع إليك الطريقة
العلاقات الجنسية مش شطارة
في بعض الحالات بيتورط بعض الشباب في إقامة علاقات جنسية خارج إطار الزواج، لكنه بيكون غير مدرك لخطورة اللي بيعمله؛ خاصة أن الممارسات دي ممكن توصل لحد الإدمان.
وفي الجزء ده، بيؤكد الطبيب النفسي، الدكتور إبراهيم مجدي أن العلاقات الجنسية خارج الزواج مثل العادة السرية، هتخليك معتاد على أسلوب معين في العلاقة الحميمة، وده هيؤثر على علاقتك بزوجتك في المستقبل.
وبيضيف أن العلاقات دي ممكن تحدث نوع من الندم والشعور بالدونية.. لكن الإحساس ده بيختفي للأسف بالتعود، وهو شيء خطير لأنه بيمنع الشباب من التراجع عن إدمان هذه الممارسات.
وبيوضح ليك الخبير التربوي أن التورط في العلاقات الجنسية، بيكون بسبب حالة التمرد اللي بيشعر معاها المراهق أنه بيثبت شخصيته ويمارس حريته رغم كل القواعد والقيود اللي تربى عليها؛ بالإضافة للتوعية الخاطئة من المجتمع اللي بيصور للمراهق أن هذه الممارسات نوع من الرجولة.
وبينصح ناصر الشاب والفتاة بوضع حدود في تعاملاتهم التي يجب ألا تتجاوز الزمالة أو التعامل في الدراسة أو العمل، عشان ماتفتحش المجال للعلاقات دي؟
إدمان الجنس.. حكايات الرغبة المتوحشة وأسرار المرض
هل الوقت سيصلح هذه الأخطاء؟
ممكن يشوف البعض أن الشباب من الطبيعي أنه يدخل في واحدة من التجاربدي ، وأنه هيتخلى عنها مع الوقت والدخول في مرحلة النضوج.
وعلى الكلام ده بيعلق «ناصر» وبيقول إن حب التجريب والمغامرة اللي بيتمتع بيه الشباب هيحول السلوكيات دي إلى عادات والعادة هتتحول مع الوقت إلى إدمان يصعب التخلص منه.
