غير المولات وقعدة البحر.. أماكن هتبسطك طول العيد في إسكندرية

أكتر سؤال بيتكرر كل عيد هو هنخرج فين؟.. لو كنت إسكندراني أو بتقضي العيد في إسكندرية وخلصت كل أماكن الخروج والفسح وشبعت من البحر وعايز تروح مكان مختلف ما روحتهوش قبل كده تتبسط فيه انت وكل العيلة، متقلقش.

في التقرير ده جيبنالك أماكن مختلفة تقضي فيها يوم كامل لعب وتصوير وأكل بعيد عن قعدة البحر، وزحمة المولات.

قرية الأسد

تقع قرية الأسد بالكيلو 59 في طريق إسكندرية الصحراوي، وهتلاقيه فيها مجموعة من الحيوانات، وهتلاحظ من أول ما تدخل القرية الطراز المميز للمكان بالكامل واللي بينقلك لجو الغابة حتى في ديكور المطاعم والكافيتريات اللي هناك.

في قرية الأسد هتقدر تشوف طريقة صنع الفطير الفلاحي في أفران الفلاحات، وتتفرج على بحيرة الأسماك وكمان عدد كبير من الحيوانات الأليفة والمفترسة (في أقفاص)، وما تنساش إن السيرك مفتوح كل أيام العيد من الساعة 12 الظهر لـ 8 بالليل، كل ده بتذكرة شاملة 30 جنيه للفرد، بالإضافة لوجبة الغدا لو قررت تاكل هناك.

أفريكانو بارك

تقع على طريق الإسكندرية القاهرة الصحراوي الكيلو 65، وتعتبر حديقة حيوانات مفتوحة (غابة)، وعشان كدة الإدارة بتسمح لأي أسرة بالدخول بسيارتها الخاصة بـ500 جنيه والتجول بين الحيوانات والتصوير معاها، وممكن تتمشى من غير عربية ولكن ده متوقف على خطورة الحيوانات اللي بتقابلها، بخلاف وجود بحيرات وشلالات ومناظر طبيعية جميلة.

أفريكانو بارك مفتوحة كل يوم في العيد من 9 صباحا لـ 5 مساءً، والدخول بـ 80 جنيه للفرد شاملة التجول في الغابة والتصوير غير تمن الغداء، ولكن لو داخل وحتتحرك بعربيتك الخاصة يبقى 500 جنيه ليك ولكل اللي معاك في العربية.

أكوا سيتي

تعتبر أكوا سيتي أكبر مدينة ألعاب مائية متخصصة في إسكندرية وموقعها في لكيلو 44 طريق (إسكندرية- القاهرة الصحراوي)، وهتلاقي فيها 3 أحواض للأطفال، وحوض كبير لألعاب الكبار، و3 مزلقانات بارتفاع 15 متر تقريبا مع دوران، واحدة منهم مقفولة، وحوض كبير متدرج فيه أمواج البحر مناسب للكبار والصغار، وهتقدر تستمتع بالجو والألعاب هناك مهما كان سنك.

وطبعا فيه ألعاب تانية غير الألعاب المائية زي عربيات الكهربا والبلياردو والبينج بونج، بخلاف محلات الآيس كريم والمطاعم، وسعر التذكرة خلال العيد مخفض ويتراوح من 90: 100 جنيه للفرد الواحد حسب وجبة الغذاء (بدلا من 130 جنيه)، والأفض تحاول تحجز قبل ما تروح.

ملاهي المعمورة

تعتبر ملاهي المعمورة من أشهر مدن الملاهي في شرق إسكندرية رغم إن مساحتها مش كبيرة إلا إنها بتضم أغلب الألعاب اللي بتجذب الرواد سواء من الصغار أو الرواد خاصة خلال آخر سنتين بعد ما زادت عليها ألعاب كتير أهمها (ديسكوفيري).

تقدر بسهولة توصل للملاهي من دخولك من بوابة المعمورة رقم 2 (بوابة الإصلاح) وهنا هتدفع 10 جنيه، غير 5 جنيه رسوم دخول الملاهي نفسها، وأسعار مختلفة بقى للألعاب جوة حسب كل لعبة.

فانتزى لاند

تعتبر فانتزي لاند مدينة الملاهي الوحيدة المعروفة لأبناء المحافظات التانية لأن موقعها أمام كوبري محرم بك، يعني قريبة قوي من بوابات طريق إسكندرية الصحرواي، ومن حيث المساحة فهي تعتبر أول وأكبر ملاهي للكبار والأطفال في الإسكندرية، وفيها 30 لعبة مختلفة للكبار والصغيرين، وعرض مسرح للاطفال داخل جزيرة للاطفال، بسعر دخول 40 جنيه بس، ولكن فيه ألعاب معينة ليها تذكرة إضافية.

مركز كرمنتس الترفيهي

محدش يعرف مول (جرين بلازا) إلا ولازم يكون سمع عن كرمنتس (أكبر مركز ألعاب) في أي مول في إسكندرية كان مخصص لألعاب الأطفال المختلفة سواء المعتمدة على الحركة أو الفيديو جيم، وفي المركز تم إضافة قسم للكبار، بيضم ترابيزات بلياردو وبينج بونج وبلاي  ستيشن.

مفيش حد بيدخل (كرمنتس) إلا ولازم يلاقي لعبة بيحبها.. وأسعار الألعاب بتختلف حسب كل لعبة.