في رمضان.. اعمل الحاجات دي مع مراتك

رمضان شهر في السنة، بس لازم الواحد يستعد ليه من قبل ما يجي. وعشان كده عايزينك تستعد وتراعي شوية حاجات مع مراتك.

الحاجات دي مش إحنا اللي هنقولها ليك، لأ ده الزوجات هما اللي هيقولوا ليك إيه اللي بيضايقهم وبيتمنوا تعمل ايه. ركز في التجارب بقى واعرف هتراعي مراتك إزاي :)

ساعدني وقدّر إني بتعب في شغل البيت

تقول مريم (اسم مستعار) «مش بيقدر إني صايمة زي زيه وتعبانة ومهدودة في البيت، وأهم حاجة عنده إن الأكل يكون جاهز وبسرعة ومش بيساعدني حتى في تحضيره وإنوا كمان بيكون معتقد إني قاعدة مريحة في البيت».

وتضيف «أنا بشتغل في البيت كتير ومعايا أطفال براعيهم يعني بشتغل زي زيه. وكمان مش بيخرج بعد الفطار وأنا بكون مستنية منه نخرج ونتفسح واللي بتمناه إنه يساعدني ويقدرني ويراعي إني بشتغل زيه».

ومش تعبانة مع إني بشتغل في البيت كتير ومعايا أطفال براعيهم يعني بشتغل زي زيه وكمان مش بيخرج بعد الفطار وأنا بكون مستنية منه نخرج ونتفسح واللي بتمناه إنه يساعدني ويقدرني ويراعي إني بشتغل زيه»

يسيب صحابه ويخرج معايا

أما نادية (اسم مستعار) قالت: «بضايق قوي لما يزنقني في عزومة ويقولي عليها قبلها بيوم وكمان بضايق لما يتأخر على الفطار أو يفطر مع أصحابه وميفطرش معايا وإنه كمان كل شوية يقولي أعزم ماما وأنا بكون تعبانة من كتر العزومات والوقفة في المطبخ واللي بتمناه إنه يخرج معايا زي ما بيخرج مع أصحابه».

نفطر بره البيت وبلاش تنتقد الأكل 

وسمر قالت «بكون مضغوطة في الوقفة في المطبخ وأنا صايمة وهو مش بيساعدني وعايز الأكل يتعمل بسرعة ومتأخرش ومش بيعتبر إني صايمة زي زيه وتعبانة ومش بس كدة ده كمان بينتقد أكلي».

وتضيف «بيقولي الأكل حادق.. لأ الأكل دلع.. إيه ده الأكل مش مظبوط. واللي بتمناه إنه يبطل ينتقد أكلي ونفطر برا سوا كام يوك عشان أترحم شوية من عمل الأكل وإنوا يبطل ينام كتير ويسبني قاعدة لوحدي».

بلاش تروح القهوة وتسيب بيتك

ريهام بقى قالتلنا «أكتر حاجة بتضايقني إنه ينزل بعد الفطار ويروح القهوة ويسبني قاعدة لوحدي وبتمنى إنه ميرجعش من الشغل ينام ويفضل قاعد معايا وإنوا يتفرج معايا على الحاجات اللي بحبها».