قصص قبل النوم للأطفال سن 8 و9 و10

يعشق الأطفال سماع الحواديت بأشكالها المختلفة سواء كانت حقيقية أو خيالية قبل الاستغراق في النوم، ونستعرض قصص قبل النوم للأطفال سن 8 و9 و10.

قصص قبل النوم للأطفال سن 8

قصص قبل النوم للأطفال سن 8 و9 و10، من العادات المفضلة التي يحرص العديد من الآباء والأمهات عليها، لتنمية المهارات اللغوية وزيادة الخيال، وينشر «شبابيك» قصص جذابة وشقية، ومنها:

• الأرنب والضفدع

(كان يا مكان.. في يوم من الأيام كان في أرنب صغير قاعد لوحده، والضفدعة أخدت بالها أن مفيش حد بيلعب معاه، فطلبت منه يلعبوا سوا، بس الأرنب فكر وخاف يكون ده فخ من الضفدعة، وبعد كده قالها إنه هيفكر لو ينفع يكونوا أصحاب وهيرد عليها).

(وجري الأرنب على الثعلب، وحكاله اللي حصل، وسأله ممكن يحصل صداقة بينه وبين الضفدعة، بس الثعلب المكار استدرجه، وقاله تعالى نفكر سوا في الموضوع ده وأنا هقولك تعمل إيه).

(الأرنب الصغير صدق الثعلب المكار ومشي معاه، وبعدين سأل نفسه يا ترى هيكون رده إيه على صداقته مع الضفدعة ولا لا، وهو ماشي سرحان الثعلب جه من وراه وكان هيأكله، بس الضفدعة أنقذته، ومن هنا بقوا أصحاب).

• الشجرة المغرورة

(كان يا مكان.. في يوم من الأيام كان في شجرتين في حديثة، واحدة فيها تفاح أحمر، والثانية زيتون، بس شجرة التفاح كانت مغرورة، ودايمًا تتباهى بجمالها، وبتغلط في الشجرة التانية، وفي يوم حاول أطفال ياخدوا تفاح بس كانت بترفض، وتخبي التفاح عشان محدش ياخده).

(وفي مرة عدى خروف صغير، وكان بيدور على ورقة شجر عشان يأكلها، بس هي منعته، ولما سمعت شجرة الزيتون نادت عليه وطلبت منه يأكل من ورقة لحد ما يشبع، ونصحت شجرة التفاح أنها تساعد غيرها بس هي رفضت بغرور).

(وفي ليلة من الليالي جت عاصفة قوية جدًا، ومقدرتش شجرة التفاح المغرورة أنها تحمي نفسها من الرياح القوية، بعدما ما خلصت العاصفة اتفاجأت كل فروعها اتكسرت والتفاح واقع على الأرض، ومبقاش عندها حاجة تتباهى بيها، وحست بالندم وعرفت أنها مقدرتش النعمة اللي كانت عندها).

قصص قبل النوم للأطفال سن 9

• مؤمن والحلوى

(كان يا مكان.. في يوم من الأيام كان في ولد اسمع مؤمن وكان بيحب يأكل الحلويات، وطلب من مامته كيكة، بس مكنش في بيض ودقيق في البيت، ومامته طلبت منه يروح يشتريهم من السوبر ماركت).

(ومؤمن في طريقه للسوبر ماركت قابل أحمد صاحبه، وراحوا سوا واشتروا طلباتهم، وهما راجعين مؤمن وقع في حفرة كبيرة، واتكسر البيض منه، وفضل قاعد يعيط مش عارف يقول إيه لمامته).

(أحمد قاله إنه يكذب ويقولها إن الفلوس وقعت منه قبل ما يوصل السوبر ماركت، وفضل مؤمن حيران يقول لمامته الحقيقة ولا لا، وأول ما وصل البيت عيط وحكى لمامته اللي حصل، وهي سامحته، طلبت منه ياخد باله من نفسه ويركز وهو في الطريق، وأديته فلوس تانية عشان يشتري البيض).

• الطفل المثالي

(كان يا مكان.. في يوم من الأيام كان في طفل اسمه نادر، وكان ذكي ومحبوب من المدرسين في المدرسة وأصحابه كمان، ودايمًا بيجيب الدرجات النهائية، وزمايله كان بيسألوه عن سبب تفوقه الكبير).

(نادر قالهم إنه بيعيش في بيت هادي مع باباه ومامته، وكل حد في الأسرة بيحترم التاني، وإنهم بيحترموا خصوصيات بعض، وكما بيساعدوا بعض في شغل البيت وحل المشاكل، والواجب المدرسي).

(وقال لزمايله كمان، أنه حريص على أداء فروض الصلاة في معادها، ومتعود يتجمع مع أسرته ويأكله كلهم سوا مش كل حد يأكل لوحده في معاد، ولما بيروح المدرسة بيبقى عنده هدف واحد عايز يحقق أنه يتفوق ويعمل واجباته).

(نادر قال لزمايله، إنه كما بيلعب شوية، وبعدين بينام بدري عشان يستعد لليوم الجديد، ويصحى فايق ومركز لدروسه).

قصص قبل النوم للأطفال سن 10

• مريم والكنز الغامض

(كان يا مكان.. في يوم من الأيام كان في بنت اسمها مريم بتحب قراءة كتب المغامرات والأساطير، وفي مرة لقت كتاب قديم المكتبة بتاعت جدها بعنوان خريطة الكنز المفقود، وكان موجود جواه خريطة لمكان الكنز في غابة).

(بدأت مريم رحلتها الشيقة المليانة ألغاز وتحديات، وفي كل مرحلة بتحل لغز عشان تتنقل للمرحلة التانية، لحد ما وصلت لآخر مكان ولقت صندوق، وفرحت افتكرته كله ذهب).

(بس مريم لما فتحت الصندوق، لقت جواه رسايل قديمة كلها نصايح عن أهمية العائلة، والصداقة والشجاعة والأمانة، وفهمت أن الرحلة كلها تجارب ودروس واستفادة معنوية مش فلوس).

• الأمير الصغير والتنين الصديق

(كان يا مكان.. في يوم من الأيام في مملكة بعيدة، كان في أمير صغير اسمه آدم، كان دايمًا بيسمع على تنين موجود في جبل، أنه شرير وبيهاجم القرى، وقرر أنه يروح يواجهه عشان يحمي الشعب).

(لما وصل الأمير للجبل، لقى التنين طيب وغلبان ولوحده، واكتشف أن الناس كانوا بيخافوا منه عشان هو مختلف عنهم، لكن هو مش شرير زي ما كانوا هما فاكرين).

(الأمير آدم والتنين بقوا أصحاب، وقال إنه لازم يعلم الناس عن محدش يحكم على أي حد إلا لما يعرفه، مينفعش يحكموا من بعيد).