لطلاب الثانوي.. 7 نصائح لتهزم «الإحباط»
حاسس بالإحباط ومش عارف إزاي تتغلب عليه؟ نفسك في حل تقوي نفسك بيه من غير ما تحس إن كل حاجة بتعملها هتفشل في النهاية وإن اللي ذاكر زي اللي مذاكرش؟
«شبابيك» سأل أستاذ علم النفس الدكتور محمد مديد اللي قرر يقدملك نصائح لو نفذتها صح عمرك ما هتحس بالإحباط:
حدد هدفك
لو أنت مش محدد هدفك فده ممكن يكون سبب من أسباب الإحباط. مهم جدًا علشان تتجنب فخ الإحباط، إنك تحدد هدفك من البداية، لإن ده بيوفر طاقتك.
لا استسلام
عود نفسك إن اليأس مش هيوصلك غير ليأس تاني، وإن المخترعين لو كانوا استسلموا لأي حالة إحباط عمرهم كانوا هيوصلوا للعالمية، بالعكس قول لنفسك إن الصعوبات دي مبتواجهش غير اللي عندهم هدف علشان تحاول ترجعهم عن الطريق.
لطلاب الثانوي.. 6 نصائح عشان تدخل في جو المذاكرة
اعمل اللي عليك
طول ما أنت عارف إنك عملت مجهود حتى لو اللي حواليك شايفينه قليل، عمرك ما هتحس بأي إحباط، كل اللي عليك الفترة دي إنك فعلا تشتغل على نفسك كويس ومتسمعش لأي حد يقولك إنك مهما ذاكرت التنسيق مش هيدخلك الكلية اللي أنت عاوزها أو إنك مهما ذاكرت هتفضل مقصر.
بلاش مقارنات
النقطة دي تقريبًا هي سبب كل المشاكل والإحباط، لازم تعرف إن في فروق فردية بين البني آدمين وإن كل واحد ربنا مميزه بشيء مش موجود عند غيره.
لو بطلت تقارن نفسك أو حتى تسمح لأهلك يقارنوك بزميلك أو قريبك اللي بيذاكر 20 ساعة في اليوم، هتعرف تحصل كويس أنت في الـ 10 ساعات بتوعك.
لماذا ينتصر الإحباط ولا نحقق أهدافنا؟
خليك إيجابي
مهم جدًا إنك تتعلم إزاي تحول السلبيات لإيجابيات، يعني مثلًا لو قريبك دائمًا بيتعمد إنه يحسسك إنك أقل منه وعمرك ما هتوصل للكلية اللي دخلها، اثبتله أنت العكس وخلي كلامه ده يبقى حافز أنك تبقى حاجة وتوصل للي أنت عاوزه في النهاية علشان تنفيذ الأحلام مش بسهولة.
اختار قدوة لنفسك
طول ما أنت ليك قدوة، هتفضل دائمًا بتابعها في كل حاجة، ومش معنى كده إن ميكونش ليك شخصية مستقلة، لا المقصود هنا طريقها في تنفيذ الحلم، إزاي كانت بتعرف تعدي الصعوبات وإزاي خلت المشاكل اللي حواليها متأثرش على حلمها.
تجنب صاحبك السلبي
مين مننا معندهوش الصاحب اللي دائمًا بيحسسك إنه هيسقط وإنه مهما ذاكر مش فاهم حاجة، في الفترة دي حاول تبعد عن أي مصدر ممكن يديك طاقة سلبية وإحباط لإنه بينه وبين نفسه بيبقى الوضع مختلف.
