سهى حسن تكتب: الست المصرية نكدية.. والحل؟

الست المصرية نكدية بطبعها ولو في حد في الكون بحاله هيقول للنكد قوم وأنا أقعد مطرحك، فأكيد اللي هيعمل ده الست المصرية وده شيء مش محل جدال لإنه حقيقة للأسف.. طيب الحل إيه؟

أنا مؤمنة إن النكد بيقصر العمل، ولإني في الأساس مش منكرة حقيقة إن الست المصرية نكدية، شايفه إنه من الضروري إننا نشوف حل للمشكلة دي، وعشان كده قررت أكتب المقال ده لعل وعسى صوتي يوصل ويجيب نتيجة.

أولا وقبل كل شئ.. عزيزتي الست المصرية.. بمنتهى الصراحة كده مش إنجاز ولا ليفل متقدم إنه يتقال على الواحدة إنها حرم المرحوم فلان.. الأعمار بيد الله طبعا، بس خلينا متفقين إن النكد ده مرض زي أي مرض كل ما كان كبير كل مكان خطير أكتر، وعشان كده اسمعي مني الآتي.

شغل مش لعب

جوزك لما بيكون بره البيت مش بيكون بيلعب ولا في «Spa» عالمي عشان لما يدخل البيت تستقبليه بتكشيرة أو خناقة لأي سبب.. في الأساس هو كان في شغل ولو حضرتك مشتغلتيش قبل كده فالشغل ده في بعض الأحيان بيكون الضغط على أعصابه فيه زي ما تكوني عازمة 100 شخص على الغداء.. تخيلي بقى هو بيكون في الضغط ده كل يوم.

حاجات تافهة

لو هتاخدي رأي جوزك في خاتم ولا في فستان، وقلك عليه كويس، متقولهوش بس فلانة قلتلي إن الخاتم ولا الفستان التاني أحلى وهوب خناقة من لا شيء.. أولا دي أراااء.. وده رأيه وهو حر فيه يا ستي.. ثانيا الرجالة في تركيبتهم وجdناتهم دي أمور مش مهمة فكويس إنه هو قالك رأيه فبلاش بقى أفورة.. وقيسي على المثال ده في حاجات كتير.

في طبيعة الستات النميمة والرغي.. والرجال في الطبيعي ملهمش في الكلام ده، لازم تبقى عارفه ده عشان ده مترتب عليه حاجات كتير.. منها على سبيل المثال إنه مش هتلاقيه بيتكلم في مواضيع كتير بالتفصيل زيك، وعشان دي طبيعته فده مش معناه إنه بيخبي عليكي ومش بيحكيلك.

ولنفس السبب هتلاقيه مبيحبش النميمة بتاعت فلانة قالت وأختك مكلمتنيش ومرات أخوك عملت.. لو رجعتي شريط حياتك كده معاه هتلاقي إنه مبيعملش كده معاكي.. فالطبيعي إنه ده هينكد عليه يعني م الآخر.. لأ والأسوأ بقى إنك ممكن تنزلي من نظره ويشوفك عايزة توقعي بينه وبين أهله.. ولما الراجل بيحس بده هتلاقي جاله الضغط والسكر ووو.. بس إنت ملكيش ذنب خالص ده قضاء وقدر :D .

كلمة أخيرة

عشان المقال ميبقاش طويل وممل، عايزة أقول كلمة أخيرة.. عزيزتي الست المصرية النكدية.. لو أنت من غير سبب وجوزك جنبك قلبتي فجأة وكشرتي.. انت مش بتنكدي على جوزك بس.. انت بتاكلي من رصيدك عنده.. وبكره وبعده تلاقيه بيبصبص بره ومش بعيد يتجوز كمان عليكي.

عزيزتي الست المصرية النكدية .. راجعي شريط حياتك، شوفي إنتي نكدية بنسبة قد إيه وحاولي تخففي نكدك.. انت نكدية رسمي لو مودك بيتغير بسرعة وبتعملي مشاكل مع جوزك باستمرار وبتدققي في تصرفاته وأخطاءه عشان لما تتخانقي معاه تفرشيلوه الملايه....