حواديت وحكايات رومانسية قبل النوم


حدوتة قبل النوم للحبيب بالعامية

يهوى الكثير من الأشخاص سماع القصص والحكايات الرومانسية، سواء حقيقية أو خيالية من وحي خيال مؤلفها، لذلك نستعرض أكثر من حدوتة قبل النوم للحبيب بالعامية تتنوع ما بين قصص مشهورة وحكايات رومانسية ممتعة.

حدوتة قبل النوم للحبيب بالعامية قصيرة

يروق للكثير من الأشخاص سماع الحكايات باللغة العامية أكثر من الفصحى، حيث يجعلهم ذلك يستمتعون أكثر، لذلك نستعرض قصص قبل النوم رومانسية بالعامية فيما يلي:

  • السندباد والأميرة الأسيرة

(كان يا مكان.. في يوم من الأيام وصل السندباد لميناء اسمه مانهلير، وهو واحد من أغنى المواني في فارس، عشان كده قدر يبيع بضاعته بسعر كويس، واشترى صبار وبخور وصندل ولؤلؤ وقماش مطرز، ولما السفينة بدأت تتحرك نائب سندباد اللي اسمه ليبيك قاله أنا سعيد عشان هتسيب المدينة دي عشان كل ما أشوف قصر السلطان بفقد أعصابي، لأنه سجن الأميرة زبيدة لمجرد أنها رفضت تتجوز ابنه الوحيد)

(حكى ليبيك للسندباد كمان أن والد الأميرة بعت فرسان وجنود كتير عشان ينقذوا الأميرة لكن كلهم اتقتلوا، فقرر السندباد أنه يروح للسلطان وفعلا راح زيارة وهو لابس أفخم الملابس ومعاه ستة من الخدم شايلين هدايا فخمة عشان كده قدر يقابل السلطان وابنه)

(شكر السلطان السندباد على زيارته وقاله أنه سمع كتير عن السندباد البحري، والسندباد قاله أنا جبتلك هدايا من كل أنحاء العالم في مقابل أنك تفرج عن الأميرة زبيدة، فالسلطان وابنه اضايقوا جدا وطردوه من القصر هو والخدم ولكن الهدايا بتاعته فضلت في القصر)

(السندباد مستسلمش وفضل يسأل لحد ما عرف أن كل أسبوع بيروح القصر أوعية فيها ميه بتيجي من عين في الجبل عشان يشرب منها السلطان وكبار القوم، فاشترى السندباد الأوعية دي وتنكر في لبس سقا وراح القصر ولما الحراس شافوا الأوعية فتحوا الباب، وقدر السندباد يدخل القصر بس مكنش معاه وعاء على كتفه بس لأ كان معاه كمان سيف وعصايا كبيرة)

(راح السندباد للمكان اللي فيه الأميرة زبيدة وحاول الحراس أنهم يمنعوه لكنه قدر يقنعهم إن ده أمر السلطان، ولما دخل الصالة سأل الحارس هو أنت عايز تشرب من مية كبار القوم، ولما الحارس ميل عشان يشرب ضربه على راسه بالعصايا، والحارس التاني لما لقي زميله اتأخر راح يشوفه وفي لحظات كان نايم جنبه وقدر السندباد أنه يضرب الحراس الستة كلهم)

(جري السندباد بسرعة للمكان المحبوسة فيه الأميرة قبل ما جرس الإنذار يضرب، ودخل الأوضة اللي فيها وهو شايل جرة على كتفه وقدر يقنع الحارس أنه مأمور أنه يودي الميه هناك، وأول ما شاف الأميرة اندهش من جمالها)

(ساب السندباد الجرة على الأرض، وقال للأميرة بصوت واطي أنا جيت عشان أخلصك أدخلي الجرة ومتخافيش وفعلا وافقت الأميرة، وبعدين شال السندباد الجرة على كتفه ومشي في القصر وحطها على بغل ومشي بسرعة، ورغم أن جنود السلطان طاردوه لكن بحارة السندباد قطعوا الطريق عليهم، وقدر السندباد أنه يوصل للسفينة ومعاه الأميرة، ورجع أتباعه وبعدين اتحركت السفينة بعيد، بادلت الأميرة السندباد الحب واتجوزا وسط فرحة الجميع)

  • صورة الحب والإخلاص

(في عام 1975 قررت طالبة اسمها شارلوت، من أسرة غنية سويدية أنها تسافر للهند عشان فنان هندي مشهور يرسمها، وكان الفنان ده اسمه براديومنا ومن أسرة فقيرة من الطبقة الدنيا، ورغم ظروفه الصعبة إلا أنه اشتهر عشان كان رسام موهوب، وده اللي دفع البنت أنها تسافر عشان يرسمها)

(في الوقت اللي انتهى فيه من الصورة كانوا الاتنين وقعوا في حب بعض، وكان براديومنا مفتون بجمال شارلوت، وحاول يظهر كل جوانب جمالها في الصورة لكنه مقدرش، لكن رغم كده كانت الصورة جميلة جدا)

(لما وقعت شارلوت في حب براديومنا قررت تفضل في الهند لفترة أطول، والأيام بقت أسابيع وبعدين شهور، ولما زاد حبهما قرروا يتجوزوا حسب الطقوس الهندية، لكن اضطرت شارلوت السافر للندن عشان تكمل دراستها، ورغم أن آلاف الأميال فصلت بينهم لكن مشاعرهم مقلتش، وفضلوا يتواصلوا مع بعض بالرسايل كل أسبوع تقريبا)

(عرضت شارلوت على زوجها إنها تشتري له تذكرة طيران لكن رفض ووعدها أنه هيعمل أي حاجة عشان يقدر يشوفها، ولما خلص دراسته باع كل ممتلكاته لكن الفلوس مكفتش سعر تذكرة الطيران، ومقدرش يشتري غير عجلة لكن في نفس الوقت قرر أنه مش هيسمح للظروف الصعبة تمنعه من أنه يشوف حبيبته وزوجته)

(قرر براديومنا أنه يسافر من الهند للعالم الغربي بالعجلة، وأخد معاه كل لوحاته وفرشه عشان يقدر يجيب فلوس في رحلته، ومر في رحلته على 8 بلاد واستمرت أكتر من 4 شهور، وقدر في الأخر يوصل لحبيبته ويشوفها مرة تانية ومفترقوش تاني لفترة طويلة)

  • حدوتة قبل النوم سندريلا

حكاية سندريلا من أشهر الحكايات الرومانسية التي يستمتع بسماعها أو مشاهدتها الأطفال والكبار على حد سواء، ونقص عليكم هذه الحدوتة بالعامية فيما يلي:

(كان يا مكان... كان فيه راجل قرر الزواج بعد وفاته زوجته الأولى ولكن كانت زوجته الثانية مغرورة ومسيطرة وبناتها الاتنين كانوا أسوأ منها، لكن بنت الراجل ده من زوجته الأولى كان اسمها سندريلا وكانت جميلة ورقيقة لكن للآسف مرات باباها وبناتها بيعاملوها معاملة وحشة عشان بيغيروا منها، وكانت بتشتغل زي الخدامة في البيت تنضف وتغسل وتكوي، وكان لبسها قديم ومقطع وبتنام على مرتبة قديمة)

(في يوم من الأيام دعا الملك كل البنات في المدينة للرقص في القصر، والبنتين لبسوا أجمل لبس ومجوهرات لحضور الحفلة وسندريلا ساعدتهم، لكن هى كانت حزينة عشان كانت عايزة تحضر الحفلة، وفي الوقت ده ظهرت ليها الساحرة الطيبة وحولت القرعة إلى عربية فخمة وحولت الفيران إلى 6 أحصنة تجر العربية، وبعدين حولت فستان سندريلا لفستان جميل مطرز بالدهب والفضة والجزمة بقت جزمة من الزجاج جميلة)

(طلبت الساحرة الطيبة من سندريلا إنها ترجع البيت قبل الساعة 12 بالليل، لأن كل حاجة هترجع زي ما كانت قبل كده، ولما سندريلا وصلت الحفلة لفتت نظر كل الناس ليها ومنهم الأمير اللي فضل يرقص معاها كتير، وهى كانت سعيدة ومبسوطة ونسيت كل حاجة لكن أول ما سمعت دقات الساعة 12 جريت قبل ما تودع الأمير)

(الأمير جري ورا سندريلا لكن ملقيش غير فردة واحدة بس من الجزمة الزجاجية، وفي تاني يوم الملك أعلن إن الأمير هيتجوز صاحبة الجزمة دي، وكل الأميرات والدوقات والنساء الموجودين في قصر الملك جربوا فردة الجزمة لكن مجتش على أي واحدة منهم، ومبعوث الملك راح للبيت اللي فيه سندريلا والبنتين حاولوا يلبسوا الجزمة لكن مدخلتش في رجلهم)

(طلبت سندريلا إنها تقيس الجزمة وزوجة باباها حاولت تمنعها لكن مقدرتش، وفعلا لما مبعوث الملك حط فردة الجزمة في رجل سندريلا دخلت بمنتهى السهولة وكل الناس استغربت، وبعدين سندريلا طلعت الفردة التانية ولبستها، وفي اللحظة دي حولت الساحرة فستانها لفستان جميل جدا، واتجوزت سندريلا الأمير وعاشوا في سعادة)

المصدر

أسماء أبو بكر

عن كاتب المقال: صحفية مصرية حاصلة على كلية الإعلام من جامعة القاهرة، تهتم بشؤون الطلاب

ميكس ميديا